ހުޅުމާލޭގައި ހުންނަ މަސްޖިދުލް ޝައިޚް ޤާސިމް ބިން އަލްޘާނީ (ހުޅުމާލެ ގްރޭންޑް މިސްކިތް) މަރާމާތުކޮށް އަޕްގްރޭޑް ކުރުމަށް އުރީދޫ މޯލްޑިވްސް އާއި ގަތަރު ޗެރިޓީ ގުޅިގެން މަސައްކަތް ކުރުމަށް އެބަސްވުމެއްގައި ސޮއިކޮށްފިއެވެ. މި މަސައްކަތް ނިންމުމަށް ރާވާފައިވަނީ ކުރިއަށް އޮތް ރަމަޟާން މަސް ފެށުމުގެ ކުރިންނެވެ.
ދޯހާގައި ބޭއްވުނު ޚާއްޞަ ރަސްމިއްޔާތެއްގައި މި އެއްބަސްވުމުގައި ސޮއިކުރެއްވީ އުރީދޫ މޯލްޑިވްސްގެ ސީއީއޯ އަދި އެމްޑީ ޚާލިދު އަލް-ހަމާދީ އާއި ގަތަރު ޗެރިޓީގެ ޗީފް މާކެޓިން އޮފިސަރު އަހްމަދު ފަޚްރޫ އެވެ. މި ރަސްމިއްޔާތުގައި އުރީދޫ މޯލްޑިވްސްގެ ޗެއަރޕަރސަން އަލްފާޟިލާ ފާތިމާ ސުލްޠާން ކުވާރީ ވެސް ބައިވެރިވެ ވަޑައިގެންނެވިއެވެ.
2006 ވަނަ އަހަރު އިމާރާތްކުރެވުނު ހުޅުމާލޭ ގްރޭންޑް މިސްކިތަކީ 1800 އަށްވުރެ ގިނަ މީހުންނަށް އެއްފަހަރާ ނަމާދުކުރެވޭ ބޮޑު މިސްކިތެކެވެ. މިސްކިތުގެ ގޯތިތެރެ ވަނީ ގަސްތަކުން ޒީނަތްތެރިކޮށްފައެވެ. އަދި މިސްކިތުގެ އެތެރޭގައި ސީލިންގުގެ މަތީގައި ރީތި ޖިއޮމެޓްރިކް ޑިޒައިނެއް ހުރެއެވެ.
Advertisement
މަރާމާތް ކުރުމުގެ އެއްބަސްވުމުގެ ދަށުން ކުރިއަށްގެންދާ މަސައްކަތުގައި މިސްކިތުގައި ފުލް އެއަރކޮންޑިޝަން ސިސްޓަމެއް ހަރުކުރުން ހިމެނެއެވެ. މި މަސައްކަތް ވަރަށް އަވަހަށް ފެށި، ރަމަޟާން މަސް ފެށުމުގެ ކުރިން ނިންމާލެވޭނެ ކަމަށް އުރީދޫއިން ބުންޏެވެ.
މި ރަސްމިއްޔާތުގައި ވާހަކަދައްކަވަމުން އުރީދޫ މޯލްޑިވްސްގެ ސީއީއޯ ޚާލިދު އަލް-ހަމާދީ ވިދާޅުވީ، "ރަމަޟާން މަހަކީ ގިނަބަޔަކު އަޅުކަން ކުރުމުގައި މިސްކިތުގައި ގިނަވަގުތު ތަކެއް ހޭދަކުރެވޭ މަހެއް. މަސްޖިދުލް ޝައިޚް ޤާސިމް ބިން އަލްޘާނީގެ ވަސީލަތްތައް އިތުރަށް ހަރުދަނާކުރުމަށް ޤަތަރު ޗެރިޓީއާ ގުޅިގެން ކުރުމަކީ އުރީދޫ މޯލްޑިވްސްއަށް ލިބޭ ޝަރަފެއް," ކަމަށެވެ.
އުރީދޫއިން އިތުރަށް ބުނެފައިވަނީ މި މަސައްކަތުގެ ސަބަބުން ރަމަޟާން މަހުގައި އަދި އޭގެ ފަހުން ވެސް މުޖުތަމަޢުއަށް ފަސޭހަތަކެއް ލިބިގެންދާނެ ކަމަށް އުންމީދުކުރާ ކަމަށެވެ. އަދި ދިވެހި މުޖުތަމަޢުއަށް ފައިދާ ކުރާނެ ކަންކަން ކުރުމަކީ އުރީދޫ މޯލްޑިވްސްއަށް ލިބިގެންދާ ވަރަށް ބޮޑު އުފަލެއްކަމަށް ކުންފުނިން ފާހަގަ ކުރިއެވެ.
