ސަރުކާރުގެ ޚަރަދުތައް ހަމަޖެއްސުމަށްޓަކައި 2.9 ބިލިއަން ރުފިޔާގެ ޓީ-ބިލް ވިއްކުމަށް މިނިސްޓްރީ އޮފް ފިނޭންސްއިން ހުޅުވާލައިފިއެވެ. މިއީ މިއަހަރު ވިއްކަން އިޢުލާންކުރި ފުރަތަމަ ޓީ-ބިލެވެ.

ފިނޭންސް މިނިސްޓްރީން މިފަހަރު ވިއްކަން ހުޅުވާލާފައިވަނީ ހަތަރު ބާވަތެއްގެ ޓީ-ބިލެވެ. އެގޮތުން 28 ދުވަހުން އަނބުރާ ދެއްކުމަށް 523.8 މިލިއަން ރުފިޔާގެ ޓީ-ބިލަކާއި، 98 ދުވަހުން އަނބުރާ ދެއްކުމަށް 628.5 މިލިއަން ރުފިޔާގެ ޓީ-ބިލެއް ހިމެނެއެވެ. މީގެ އިތުރުން 182 ދުވަހުން އަނބުރާ ދެއްކުމަށް 838.1 މިލިއަން ރުފިޔާގެ ޓީ-ބިލަކާއި، 364 ދުވަހުން އަނބުރާ ދެއްކުމަށް 942.8 މިލިއަން ރުފިޔާގެ ޓީ-ބިލެއް ވިއްކުމަށް ވަނީ އިޢުލާން ކޮށްފައެވެ.

މި ޓީ-ބިލްތަކުގެ އިންޓްރެސްޓް ރޭޓް ހުންނާނީ 3.50 ޕަސެންޓާއި 4.60 ޕަސެންޓާ ދެމެދުގައެވެ. ސަރުކާރުން ވިއްކާ ޓީ-ބިލްތައް ގަންނަނީ ޕެންޝަން ފަންޑާއި، ބައެއް ބޭންކުތަކާއި، ސަރުކާރު ހިއްސާވާ ބައެއް ކުންފުނިތަކުންނެވެ. އަދި މީގެ އިތުރުން އަމިއްލަ ބައެއް ކުންފުނިތަކުން ވެސް ޓީ-ބިލް ގަނެއެވެ.

ޓީ-ބިލްއަކީ ގަވަރމަންޓް ސެކިއުރިޓީޒްގެ ތެރޭގައި ހިމެނޭ ކުރު މުއްދަތުގެ ސެކިއުރިޓީޒްއެކެވެ. ރާއްޖޭގެ ސަރުކާރުން ދޫކުރާ ޓީ-ބިލަކީ ދިވެހި ރުފިޔާއިން ޑިސްކައުންޓް އަގެއްގައި ވިއްކުމަށް ހުށަހަޅައި، މުއްދަތު ހަމަވުމުން ފޭސް ވެލިއު (މޫނުމަތީ އަގު) އަދާކުރާ ގޮތަށް ނަގާ ފައިސާއެވެ.