ބޮޑުވަމުން އަންނަ ކޮންމެ ތުއްތު ކުއްޖެއްގެވެސް އުންމީދަކަށް ވާނީ ޢާއިލާއާއެކު ބޮޑުވުމެވެ. މާނައަކީ، ބައްޕައާއި މަންމަ އެ ކުއްޖާ ބޮޑުވަމުން އަންނަ އިރު ގާތުގައި ހުރުމަކީ ކޮންމެ ކުއްޖަކުވެސް ބޭނުންވާނެ ކަމެއް ކަމެވެ. މިކަމުގައި ކުއްޖާގެ އުފަލާ އެއްވަރަށް އޭގެ ސަބަބުން ކުއްޖާގެ ސިއްޙަތަށާއި، ޚާއްސަކޮށް ނަފްސާނީ ދުޅަހެޔޮކަމަށް ވަރަށް ހެޔޮ އަސަރެއް ކުރާނެއެވެ. ނަމަވެސް ހިތާމައަކީ ރާއްޖޭގެ އަތޮޅުތެރޭގެ ރަށް ރަށުގައި އެކަށީގެންވާ ވަޒީފާގެ ފުރުޞަތުތައް ފަހިވެފައި ނެތުމުގެ ސަބަބުން، ޢާއިލާގެ ޙައްޤުގައި މަސައްކަތް ކުރުމަށް ގިނަ ފަހަރަށް ޢާއިލާއާ ދުރަށް ދާން ޖެހޭ ކަމެވެ.
މީގެ ސަބަބުން ކުދިންނަށް އެ ކުދިންގެ ބައްޕަ އާންމުކޮށް ފެންނަނީ އަހަރެއްގެ ތެރޭގައިވެސް ވަރަށް މަދު ފަހަރުކަން ފާހަގަކޮށްލެވެއެވެ. ޚާއްސަކޮށް ކުޑަ ކުދިންނަކީ އެ ކުދިންގެ ބައްޕަމެންނާ ވަރަށް އޮޅު ކުދިންނަށް ވާއިރު، މި ޙަޤީޤަތް މި ޤައުމުގައި ބަދަލުކުރަން ވަނީ ޖެހިފައެވެ. މިފަދަ ޙާދިސާއެއް ގެ ހިތާމަ މިއަދު ވަނީ ކުޑަ ކުއްޖަކު ރައީސް އަށްވެސް ދަންނަވާފައެވެ.
ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ހުވަދޫ އަތޮޅަށް ކުރައްވަމުން ގެންދަވާ ރަސްމީ ދަތުރުފުޅުގައި މިއަދު ވަނީ ގއ. ކަނޑުހުޅުދޫއަށް ވަޑައިގެންފައެވެ. އެ ރަށަށް ވަޑައިގެން، ރަށުގެ ރައްޔިތުންނާ ސަލާން ކުރައްވަމުން ގެންދަވަނިކޮށް ކުޑަ ކުއްޖަކު ރައީސަށް ވަނީ ނޯޓުކޮޅެއް އަރުއްވާފައެވެ. އެ ނޯޓުކޮޅުގައި ލިޔެފައި އޮތީ "ބައްޕަ މަތިން ވަރަށް މިސްވޭ" އެވެ.
Advertisement
ރައްޔިތުންނާ ސަލާންކޮށް ނިންމުމަށް ފަހު ރައީސް އަވަސްވެވަޑައިގެންނެވީ އެއީ ކިހިނެތްވާ ކަމެއްތޯ ބެއްލެވުމަށެވެ. އެގޮތުން އެމަނިކުފާނަށް އެނގިވަޑައިގެންނެވީ އެ ކުއްޖާގެ ބައްޕައަކީ ކައިރި ރަށެއްގެ ޕޮލިސް ސްޓޭޝަނެއްގައި ވަޒީފާ އަދާކުރަމުން އަންނަ މީހެއް ކަމެވެ. ރައީސް އަވަސްވެވަޑައިގެންނެވީ އެ ކުއްޖާ ބޭނުންވާ ފަދައިން، ކުއްޖާގެ ބައްޕަ އަވަހަށް ކުއްޖާގެ ގާތަށް ގެނައުމަށެވެ.
ކުއްޖާގެ އުންމީދުތައް ފުރިހަމަކުރެއްވުމަށްޓަކައި ރައީސް ވަނީ އެ ކުއްޖާގެ ބައްޕަގެ ވަޒީފާ، ކަނޑުހުޅުދޫ ޕޮލިސް ސްޓޭޝަނަށް ބަދަލުކުރައްވާފައެވެ. މިއީ ރައީސް ވަރަށް ޚާއްސަ އިސްކަމެއް ދެއްވައިގެން އެ ކުއްޖާގެ ޙައްޤުގައި ކޮށްދެއްވި މަސައްކަތެއްކަން ފާހަގަކޮށްލެވެއެވެ.
ކުއްޖާގެ އެދުމަށް ބައްޕަ ރަށަށް ބަދަލުކޮށްދިނުމުން ރައީސް އަށް ޝުކުރު ދަންނަވަނީ. ފޮޓޯ: ރައީސް އޮފީސް
ކުއްޖާގެ ބައްޕަ ރަށަށް ބަދަލުކުރާކަން އެނގުމުން ނުތަނަވަސް ވެފައި ތިބި އެ ޢާއިލާއަށް ވަނީ ދިރުމެއް ލިބިފައެވެ. އަދި ބައްޕައަށް މަރުޙަބާ ކިޔުމަށްޓަކައި ޢާއިލާއިން ވަނީ ބަނދަރު ސަރަޙައްދަށް ނުކުމެފައެވެ.
ކުއްޖާގެ ބައްޕަ ރަށަށް ފޭބުމާއެކު، ކުއްޖާ ވަނީ ގޮސް ބައްޕަ ގައިގައި ބައްދާލާފައެވެ. އެ ވަގުތުކޮޅަކީ ޢާއިލާއަށް ވަރަށް އުފާވެރި އިޙުސާސްތަކެއް ކުރުވި ވަގުތުކޮޅެއް ކަމަށް އެ ޢާއިލާއިން ފާހަގަކުރިއެވެ. އުފާވެރިކަމުގެ ކަރުނައާއެކު ކުއްޖާއާއެކު ކުއްޖާގެ ބައްޕަ ވަނީ ރައީސް ކޮށްދެއްވި މި މަސައްކަތްޕުޅަށް ފަށްފަށުން ޝުކުރު ދަންނަވާފައެވެ.
