ރާއްޖޭގެ އެކި ކަންކޮޅުތަކުގައި ހުއްޓިފައިވާ ތަރައްޤީގެ މަޝްރޫޢުތައް އަވަހަށް ކުރިއަށް ގެންދިޔުމަށްޓަކައި، ހުރިހާ ރަށަކަށް ބޭނުންވާ ބޮޑު ހިލަ ބަލްކުކޮށް ރާއްޖެ ގެނައުމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ނިންމަވައިފިއެވެ.
ރައީސުލްޖުމްހޫރިއްޔާ މިކަން ހާމަކުރެއްވީ މިއަދު ގދ. ރަތަފަންދޫއަށް ކުރެއްވި ދަތުރުފުޅެއްގައި، އެރަށުގެ ރައްޔިތުންނާ ބައްދަލުކުރައްވައި ދެއްކެވި ވާހަކަފުޅުގައެވެ.
ރައީސް ވިދާޅުވީ ރަށްރަށުގެ ބިން ހިއްކުމާއި ބަނދަރު ހެދުމުގެ މަސައްކަތްތައް ހުއްޓިފައިވާ އެންމެ ބޮޑު އެއް ސަބަބަކީ ބޮޑު ހިލަ ނުލިބުން ކަމަށެވެ. މި މައްސަލަ ޙައްލުކުރުމަށްޓަކައި، ބަލްކުކޮށް ބޮޑު ހިލަ ގެނައުމަށް ނިންމާފައިވާ ކަމަށް ރައީސް ހާމަކުރެއްވިއެވެ.
Advertisement
"ބަނދަރުތަކާއި ރަށްގިރުމުގެ މައްސަލައާއި ބިންހިކުމާއި ތޮށިލުމާއި މިހެން ހުރި ކަންކަމަށް ބޭނުންވާ ހިލަ ނުލިބުމުން މަސައްކަތް ހުއްޓިފައި ހުރޭ. އެހެންކަމުން ބޮޑު ހިލަ ގެނައުމަށް އެކަން ކުރާނެ ގޮތްތަކެއް ވަނީ ރާވާފައި. ފައިސާވެސް ވަނީ ހަމަޖައްސާދީފައި." ރައީސް ވިދާޅުވިއެވެ.
މި މަޝްރޫޢު ކުރިއަށް ގެންދިއުމަށްޓަކައި، ކުންފުނިތަކާއި މާލީ ވަޒީރާއި ޢިމާރާތްކުރުމާ ބެހޭ ވަޒީރާ އެކު މަޝްވަރާކުރައްވާފައިވާ ކަމަށްވެސް ރައީސް ފާހަގަކުރެއްވިއެވެ.
ރާއްޖޭގެ އެކި ސަރަޙައްދުތަކުގައި ތަރައްޤީގެ ގިނަ މަޝްރޫޢުތަކެއް ފަށާފައިވާއިރު، އޭގެ ތެރޭގައި ބަނދަރު ހެދުމާއި، ހިއްކި ސަރަޙައްދު ހިމާޔަތްކުރުމާއި، ގޮނޑުދޮށް ހިމާޔަތްކުރުމުގެ މަސައްކަތްތައް ހިމެނެއެވެ. ނަމަވެސް އޭގެ ތެރެއިން ބައެއް މަޝްރޫޢުތައް ހުއްޓިފައިވަނީ ރާއްޖެއިން ބޭރުން ގެންނަންޖެހޭ ސާމާނު ލިބުން ލަސްވުމާއި ނުލިބުމުގެ ސަބަބުންނެވެ.
