މި އަހަރު ބްރިކްސްގެ ރިޔާސަތު ބަލަހައްޓަމުންދާ ބްރެޒިލްއިން، އިންޑޮނޭޝިޔާ ވަނީ ބްރިކްސްގެ ފުރިހަމަ މެންބަރެއްގެ ގޮތުގައި އެ ޖަމްޢިއްޔާއާ ގުޅިފައި ކަމަށް އިޢުލާން ކޮށްފިއެވެ.
ބްރިކްސަކީ 2009 ވަނަ އަހަރު އުފެދުނު، އިޤްތިޞާދީ އަދި ސިޔާސީ ގޮތުން އެއްބާރުލުން ދިނުމަށް މަސައްކަތްކުރާ ޖަމްޢިއްޔާއެކެވެ. މި ޖަމްޢިއްޔާ އުފެދުނުއިރު މެންބަރުންގެ ގޮތުގައި ތިބީ ބްރެޒިލް، ރަޝިޔާ، އިންޑިޔާ، ޗައިނާ އަދި ދެކުނު އެފްރިކާއެވެ. ފަހުން މިޞްރު، އިތިއޯޕިޔާ، އީރާން އަދި ޔޫއޭއީ ވެސް ވަނީ މި ޖަމްޢިއްޔާއާ ގުޅިފައެވެ.
އިތުރަށް ވިދާޅުވުމަށް: އިންޑޮނޭޝިއާއިން ބްރިކްސްއާއި ގުޅުމުގެ މަސައްކަތް ރަސްމީކޮށް ފަށައިފި
އިންޑޮނޭޝިޔާ ބްރިކްސްއާއި ގުޅުމަށް ނިންމީ 2023 ވަނަ އަހަރު ދެކުނު އެފްރިކާގެ ޖޮހަނަސްބާގުގައި ބޭއްވުނު ބައްދަލުވުމުގައި ނިންމި ނިންމުންތަކާއި އެއްގޮތްވާ ގޮތުގެ މަތިންނެވެ. އިންޑޮނޭޝިޔާއަކީ ދުނިޔޭގެ ހަތަރުވަނައަށް އެންމެ ބޮޑު އާބާދީ އޮންނަ ޤައުމެވެ.
އިންޑޮނޭޝިޔާއިން ވަނީ 2024 ވަނަ އަހަރު ބޭއްވުނު އެ ޤައުމުގެ ރިޔާސީ އިންތިޚާބު ނިމެންދެން ބްރިކްސްއާއި ރަސްމީކޮށް ގުޅުން ފަސްކޮށްފައެވެ. އައު ރައީސް ޕްރަބޮވޯ ސުބިއަންތޯ ވެރިކަމާއި ހަވާލުވުމާއި ގުޅިގެން އިންޑޮނޭޝިޔާ ވަނީ މިހާރު ރަސްމީކޮށް ބްރިކްސްއާއި ގުޅިފައެވެ.
ބްރެޒިލްގެ ސަރުކާރުން ބުނެފައިވަނީ އިންޑޮނޭޝިޔާއަކީ ގްލޯބަލް ސައުތުގެ މަޞްލަޙަތު އިތުރަށް ކުރިއެރުވުމަށް މަސައްކަތްކުރާ ޤައުމެއް ކަމަށާއި، ބައިނަލްއަޤްވާމީ ޖަމްޢިއްޔާތަކަށް އިޞްލާޙު ގެނައުމަށް ގޮވާލާ ޤައުމެއް ކަމަށެވެ.
