ސްކޫލްތަކުގެ ދެވަނަ ޓާމްގެ މިޑް ބްރޭކަށްފަހު ކިޔެވުން މިއަދު އަލުން ފަށައިފިއެވެ. މިނިސްޓްރީ އޮފް އެޑިއުކޭޝަނުން ކަނޑައަޅާފައިވާ ތާވަލާއި އެއްގޮތަށް، ދަރިވަރުން މިއަދު ސްކޫލްތަކަށް ނުކުމެފައިވެއެވެ.
މިޑް ޓާމް ބްރޭކްއަށް ދަރިވަރުން ޗުއްޓީއަށް ދިޔައީ މިދިޔަ މަހުގެ 22 ވަނަ ދުވަހުއެވެ. ދެވަނަ ޓާމްގެ ކިޔެވުން މާޗް 6 ވަނަ ދުވަހާ ހަމައަށް ކުރިއަށްދާނެ ކަމަށް އެޑިއުކޭޝަން މިނިސްޓްރީން މަޢުލޫމާތު ދެއެވެ. ދިރާސީ އާ އަހަރުގެ ކިޔެވުން ފަށާނީ އެޕްރީލް 6 ވަނަ ދުވަހުއެވެ.
އެޑިއުކޭޝަން މިނިސްޓްރީން އާންމުކޮށްފައިވާ ކަލަންޑަރުގައިވާ ގޮތުން، މި ދިރާސީ އަހަރުގެ ފުރަތަމަ ޓާމްގައި ދަރިވަރުން 85 ދުވަހު ކިޔަވާފައިވެއެވެ. އަދި ދެވަނަ ޓާމްގައި 105 ދުވަހު ކިޔަވާނެއެވެ.
Advertisement
ހިނގަމުންދާ ދިރާސީ އަހަރުގެ ކިޔެވުން ފެށިފައިވަނީ 96,000 ދަރިވަރުންނާއެކުގައެވެ. މީގެ ތެރެއިން ސަރުކާރުގެ 217 ސްކޫލުގައި 83,000 އެއްހާ ދަރިވަރުން އަދި ޕްރައިވެޓް ސްކޫލްތަކުގައި 13,000 ދަރިވަރުން ދަނީ ކިޔަވަމުންނެވެ.
ސަރުކާރުން ވަނީ 2026 ވަނަ އަހަރުން ފެށިގެން ދިރާސީ އާ އަހަރުގެ ކިޔެވުން ޖެނުއަރީގައި ފަށާ ގޮތަށް ނިންމާފައެވެ.
