ހިޒްބުالله އާއި ގުޅެން ލުބުނާނާއި ސީރިއާއަށް ދަތުރުކުރި ކަމަށް ބުނާ އެމެރިކާގެ ކުރީގެ އަސްކަރީ އޮފިޝަލަކު "ޓެރަރިސްޓް" ޖަމާއަތަކަށް ތާއީދު ކުރަން އުޅުނު ކަމުގެ ދައުވާ އުފުލާފައިވާ ކަމަށް އެމެރިކާގެ ޖަސްޓިސް ޑިޕާޓްމަންޓުން ބުނެފި އެވެ.
ފްރާންސްގެ ނޫސް އެޖެންސީ އޭއެފްޕީ އިން ބުނި ގޮތުގައި އެމެރިކާގެ ޖަސްޓިސް ޑިޕާޓްމަންޓުން ނެރުނު ބަޔާނެއްގައި ބުނެފައި ވަނީ އެމެރިކާ އާއި އަޔަލޭންޑްގެ ރައްޔިތުކަން އޮންނަ އުމުރުން 24 އަހަރުގެ ޖެކް ޑޭނިއަލް މޮލޯއީ މިދިޔަ މަހު ހައްޔަރުކޮށްފައިވާ ކަމަށާއި މާދަމާ ނޫން އަނެއްދުވަހު (ހޯމަ ދުވަހު) އޭނާ ހާޒިރުކުރާނެ ކަމަށެވެ.
ދައުވާގައިވާ ގޮތުން އޭނާ ވަނީ އޮގަސްޓް މަހު ލުބުނާނަށް ދަތުރުކޮށް، ވޮޝިންޓަނުން "ޓެރަރިސްޓް" ޖަމާއަތެއްގެ ގޮތުގައި ކަނޑައަޅާފައިވާ ހިޒްބުاللهއާ ގުޅެން މަސައްކަތްކޮށްފަ އެވެ.
ލުބުނާނުގައި އޭނާ ގުޅެން ކުރި މަސައްކަތަށް ދެކޮޅު ހެދުމުން އޭނާ ބަދަލުވީ އެ ޖަމިއްޔާއާއި ގުޅެން މަސައްކަތް ކުރަމުން ދިޔަ ސީރިއާ އަށް ކަމަށް މަސްދަރުތަކުން ބުނެއެވެ.
ޖަސްޓިސް ޑިޕާޓްމަންޓުން ބުނާ ގޮތުގައި މޮލޯއީ ވަނީ ސޯޝަލް މީޑިއާގައި ޔަހޫދީންނަށް އަނިޔާކުރުމަށް ޕްރޮމޯޓްކޮށް، އާއިލާގެ މެމްބަރަކާ އެކު ވަޓްސްއެޕްގައި ކުރި މުޢާމަލާތެއްގައި "އޭނާގެ މާސްޓަ ޕްލޭނަކީ ހިޒްބުالله އާއި ގުޅިގެން ޔަހޫދީން މަރާލުން" ކަމަށް ބުނެފަ އެވެ.
'ޓެރަރިސްޓް' ޖަމިއްޔާއަކަށް މާލީ އެހީތެރިކަން ފޯރުކޮށްދިނުމުގެ ކުށް ސާބިތުވެފައިވާ އެ ދެމީހުންނަށް 20 އަހަރުގެ ޖަލު ހުކުމެއް އަންނާނެ އެވެ.
