ހުޅުމާލެ 1 ގައި ހުންނަ ސެންޓަ ފޯ ހަޔަ ސެކަންޑްރީ އެޑިޔުކޭޝަން (ސީއެޗްއެސްއީ)ގެ ކްލާސްރޫމްތައް އޭސީ ހަރުކޮށްދޭނެ ބަޔަކު ހޯދަން އެ ސްކޫލުން އިއުލާންކޮށްފި އެވެ.
ސީއެޗްއެސްއީން މިދިޔަ އާދިއްތަ ދުވަހު ކުރި އިއުލާނުގައި ބުނީ އެ މަސައްކަތް ކޮށްދޭން ޝައުގުވެރިވާ ފަރާތްތަކަށް ބީލަން ހުށަހެޅުމުގެ ފުރުސަތު އަންނަ މަހުގެ ހަތްވަނަ ދުވަހުގެ ހެނދުނު 10:00 އާ ހަމައަށް ހުޅުވާލާފައިވާ ކަމަށެވެ.
ހުޅުމާލެ ސީއެޗްއެސްއީގެ ކްލާސްރޫމްތައް އޭސީކޮށް ދޭނެ ބަޔަކު ހޯދަން އިއުލާންކުރި އިިރު، އެ ސްކޫލް އޭސީކުރަން ބޭނުންވާ ސާމާނު ރާއްޖޭގައި ހުންނަ ޗައިނާ އެމްބަސީން ވަނީ މީގެ ދެމަސްދުވަސް ކުރިން ހަދިޔާކޮށްފަ އެވެ.
Advertisement
ޗައިނާ އެމްބަސީން ވަނީ 35 ކުލާސްރޫމް އޭސީކުރަން ބޭނުންވާ 76 އޭސީ ހަދިޔާކޮށްފަ އެވެ.
މަތީ ސާނަވީއަށް ކިޔަައިދޭ އެ ސްކޫލްގައި 1،200 އެއްހާ ދަރިވަރުން ތައުލީމް ހާސިލްކުރެ އެވެ.
ހުޅުމާލެ ސީއެޗްއެސްއީ ހުޅުވުމުން ކުރިން މާލޭގައި ހިންގަމުން އައި ސީޗްއެސްއީ ބަންދުކޮށްފައި ވަނިކޮށް މި ސަރުކާރުން ވަނީ މިދިޔަ މަހު އެތަން ހުޅުވައި އަލުން ކިޔަވައި ދޭން ފަށައިފަ އެވެ.
