އިސްރާއީލުގެ ބޮޑުވަޒީރު ބެންޖަމިން ނެތަންޔާހޫ ޕްރޮސްޓޭޓް ކެންސަރުގެ ފަރުވާއަށް ސާޖަރީއެއް ކުރުމަށް ގުދުސްގައި ހުންނަ ބިމު އަޑީގެ ހޮސްޕިޓަލެއްގައި އެޑްމިޓްކޮށްފިއެވެ.
ނެތަންޔާހޫގެ އޮފީހުން މައުލޫމާތު ދީފައިވާ ގޮތުގައި، ނެތަންޔާހޫގެ ކުޑަކަމުދާ ނިޒާމުގައި އިންފެކްޝަނެއް ހެދިފައިވާތީ މި ސާޖަރީ ކުރަން ޖެހުނީއެވެ. އަދި އޭނާގެ ޕްރޮސްޓޭޓް ބޮޑުވެ، އިތުރު ގެއްލުން ލިބިދާނެ ކަމަށް ޑޮކްޓަރުން ލަފާދީފައިވާތީ، ޕްރޮސްޓޭޓް ނެގުމަށް ނިންމާފައިވާ ކަމަށް ވެސް އެ އޮފީހުން ހާމަކުރިއެވެ.
އެގޮތުން، މި ސާޖަރީ ކުރުމަށް ހަމަޖެހިފައިވަނީ އާދިއްތަ ދުވަހުއެވެ. އަދި ސާޖަރީއަށްފަހު ނެތަންޔާހޫ ގިނަ ދުވަސްތަކެއް ވަންދެން ހޮސްޕިޓަލްގައި އޮންނަން ޖެހޭނެ ކަމަށް ރިޕޯޓުތަކުގައި ބުނެފައިވެއެވެ.
Advertisement
މީގެ ކުރިން ވެސް ނެތަންޔާހޫ ވަނީ ހާނިޔާ ސާޖަރީއެއް ކޮށްފައެވެ. އަދި ހިތަށް ޕޭސްމޭކަރެއް ވެސް ލައްވާފައިވެއެވެ.
ނެތަންޔާހޫ ހޮސްޕިޓަލްގައި އެޑްމިޓްކޮށްފައިވާއިރު، އޭނާއާ ދެކޮޅަށް އިސްރާއީލުގެ ކޯޓެއްގައި ޝަރީއަތެއް ވެސް ދަނީ ހިނގަމުންނެވެ. އެ މައްސަލާގައި ނެތަންޔާހޫއާ ދެކޮޅަށް ރިޝްވަތާއި މަކަރާއި ހީލަތުގެ ދައުވާތަކެއް ވަނީ ކޮށްފައެވެ. ނަމަވެސް، މިހާރު އެ މައްސަލައިގެ އަޑުއެހުންތައް ވަނީ ފަސްކޮށްފައެވެ.
