ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު މިއަދު ވަޒީރުންގެ މަޖިލީހަށް ގެންނެވި ބަދަލާ ގުޅިގެން، ބައެއް މިނިސްޓްރީތަކުގެ މަސައްކަތްތަކަށް ބަދަލު ގެންނަވައިފިއެވެ.

ރައީސުލްޖުމްހޫރިއްޔާ މި ބަދަލުތައް ގެންނެވީ ޤާނޫނުއަސާސީގެ 116 ވަނަ މާއްދާގެ (ހ) އިން ލިބިދޭ އިޚްތިޔާރުގެ ދަށުންނެވެ. މި ބަދަލުތަކުގެ ތެރޭގައި މިނިސްޓްރީ އޮފް ހައުސިންގ، ލޭންޑް އެންޑް އަރބަން ޑިވެލޮޕްމަންޓް އުވާލެއްވުން ހިމެނެއެވެ.

އުވާލެވުނު މިނިސްޓްރީގެ މަސައްކަތްތަކުގެ ތެރެއިން ބިން ބޭނުންކުރުމާއި، އަރބަން ސަރަޙައްދުތައް ތަރައްޤީކުރުމާއި، ޤައުމީ ތަރައްޤީ ރޭވުމާއި، ތަފާސްހިސާބުގެ މަސައްކަތްތައް މިހާރު ކުރިއަށް ގެންދާނީ މިނިސްޓްރީ އޮފް ފިނޭންސް އެންޑް ޕްލޭނިންގ އިންނެވެ. އަދި ހިޔާވަހިކަމުގެ ސިޔާސަތާއި ސޯޝަލް ހައުސިންގގެ މަސައްކަތްތައް ކުރިއަށް ގެންދާނީ މިނިސްޓްރީ އޮފް ކޮންސްޓްރަކްޝަން، ހައުސިންގ އެންޑް އިންފްރާސްޓްރަކްޗަރ އިންނެވެ.

މީގެ އިތުރުން، މޯލްޑިވްސް ބިއުރޯ އޮފް ސްޓެޓިސްޓިކްސް މިހާރު ހިނގަމުންދާނީ ފިނޭންސް މިނިސްޓްރީގެ ދަށުންނެވެ. އަދި ދައުލަތުގެ އިދާރާތަކުން ލިޔާ ސިޓީތަކުގައި ނަންބަރު ޖެހުމަށްވެސް ވަނީ އައު އުސޫލުތަކެއް ކަނޑައަޅުއްވާފައެވެ.

މި ބަދަލުތަކާ ގުޅިގެން އައްޔަންކުރެވުނު އައު ވަޒީރުންނަށް މަޤާމުގެ ފަތްކޮޅު ދެއްވާފައިވަނީ މިއަދު ހެނދުނު ރައީސް އޮފީހުގައި ބޭއްވި ރަސްމިއްޔާތެއްގައެވެ. މި ރަސްމިއްޔާތުގައި ރައީސުލްޖުމްހޫރިއްޔާ ވަނީ އައު ވަޒީރުންނާ ބައްދަލުކުރައްވައި، މިނިސްޓްރީތަކުގެ އޮނިގަނޑު އެކުލަވާލުމުގައި މުވައްޒަފުންނަށް ދަތިނުވާނެ ގޮތަށް ކަންކަން ހަމަޖެއްސެވުމަށް އިރުޝާދު ދެއްވާފައެވެ.