ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު، ސަރުކާރުގެ ކެބިނެޓަށް ބޮޑު ބަދަލެއް ގެންނަވައި، ބައެއް ވުޒާރާތައް އެއްކޮށްލައްވައި، އައު މިނިސްޓަރުން އައްޔަންކުރައްވައިފިއެވެ.

މި ބަދަލުތަކުގެ ތެރޭގައި، މިނިސްޓްރީ އޮފް ހައުސިންގ، ލޭންޑް އެންޑް އަރބަން ޑިވެލޮޕްމަންޓާއި މިނިސްޓްރީ އޮފް ކޮންސްޓްރަކްޝަން އެންޑް އިންފްރާސްޓްރަކްޗަރ އެއްކޮށްލައްވައި، މިހާރު ވަނީ މިނިސްޓްރީ އޮފް ހައުސިންގ އެންޑް އިންފްރާސްޓްރަކްޗަރ އަށް ބަދަލުކުރައްވާފައެވެ. މި އައު މިނިސްޓްރީގެ މިނިސްޓަރަކަށް ޑރ. ޢަބްދުﷲ މުއްޠަލިބު ވަނީ އައްޔަންކުރައްވާފައެވެ.

މީގެ އިތުރުން، ކުރިން ހައުސިންގ މިނިސްޓަރުގެ މަޤާމު ފުރުއްވަމުން ގެންދެވި ޑރ. ޢަލީ ޙައިދަރު އަޙްމަދު ވަނީ ހަޔަރ އެޑިޔުކޭޝަން މިނިސްޓަރުކަމަށް ބަދަލުކުރައްވާފައެވެ. އަދި ކުރިން ހަޔަރ އެޑިޔުކޭޝަން މިނިސްޓަރުގެ މަޤާމުގައި ހުންނެވި ޑރ. މަރްޔަމް މާރިޔާ ވަނީ އެގްރިކަލްޗަރ އެންޑް އެނިމަލް ވެލްފެޔަރ މިނިސްޓަރުކަމަށް އައްޔަންކުރައްވާފައެވެ.

އަދި މި ބަދަލުތަކުގެ ތެރޭގައި، ޕްލޭނިންގ މިނިސްޓްރީއާއި ފިނޭންސް މިނިސްޓްރީ އެއްކޮށްލައްވައި، މިހާރު ވަނީ މިނިސްޓްރީ އޮފް ފިނޭންސް އެންޑް ޕްލޭނިންގ އަށް ބަދަލުކުރައްވާފައެވެ. މި އައު ވުޒާރާ ހިންގަވާނީ މިހާރުގެ ފިނޭންސް މިނިސްޓަރު މޫސާ ޒަމީރެވެ.