ދަތުރުފަތުރުގެ ދާއިރާގެ ޑޭޓާ މެނޭޖްމަންޓް ސިސްޓަމް ހަރުދަނާކުރުމަށް އެއްބަސްވުމެއްގައި ސޮއިކޮށްފި

ދަތުރުފަތުރުގެ ދާއިރާގެ ޑޭޓާ މެނޭޖްމަންޓް ސިސްޓަމް ހަރުދަނާކުރުމަށް ކޮންސަލްޓަންސީ ޚިދުމަތް ފޯރުކޮށްދިނުމަށް މޫސުމީ ބަދަލުތަކާއި ތިމާވެށްޓާއި ހަކަތައާއި ބެހޭ ވުޒާރާއިން ރިތަރިވަރކްސް ޕްރައިވެޓް ލިމިޓެޑާއެކު އެއްބަސްވުމެއްގައި މިއަދު ސޮއިކޮށްފިއެވެ.

މި ކޮންސަލްޓަންސީގެ މައިގަނޑު މަޤްޞަދަކީ ގްރީންހައުސް ގޭސް އިންވެންޓްރީ އެކުލަވާލުމަށް ބޭނުންވާ ދަތުރުފަތުރާއި ގުޅޭ މަޢުލޫމާތު ހޯދުމަށް ރައްކާތެރި އަދި ހަރުދަނާ ނިޒާމެއް ޤާއިމުކުރުމެވެ. މި މަސައްކަތުގެ ތެރޭގައި އޮޑޮމީޓަރ ޑޭޓާ އެއްކުރުމަށް ރޯޑްވާދިނެސް ނިޒާމެއް ތަޢާރަފުކުރުން ހިމެނެއެވެ. މިއީ އުޅަނދުތައް ދަތުރުކުރާ މިންވަރުގެ މަޢުލޫމާތު އެއްކުރުމަށްޓަކައި ކުރުމަށް ކަނޑައެޅިފައިވާ މުހިންމު މަސައްކަތެކެވެ.

ތިމާވެށްޓާބެހޭ ވުޒާރާއިން މަޢުލޫމާތު ދިންގޮތުގައި މި މަޝްރޫޢުއަކީ "ކެޕޭސިޓީ ބިލްޑިންގް ފޯ އިމްޕްރޫވްޑް ޓްރާންސްޕެރެންސީ އޮފް ކްލައިމެޓް ޗޭންޖް މިޓިގޭޝަން އެންޑް އެޑެޕްޓޭޝަން އެކްޝަން އިން ދަ މޯލްޑިވްސް" މަޝްރޫޢުގެ ދަށުން ހިންގޭ މަސައްކަތެކެވެ. މި މަޝްރޫޢުއަށް ފަންޑު ލިބިފައިވަނީ ގްލޯބަލް އެންވައިރަމެންޓް ފެސިލިޓީއިންނެވެ. އަދި އދ. ގެ އެންވައިރަމެންޓް ޕްރޮގްރާމްގެ ދަށުންވެސް އިތުރު އެހީތެރިކަން ލިބިފައިވާކަމަށް އެ ވުޒާރާއިން ހާމަކުރިއެވެ.

މި އެއްބަސްވުމުގައި މޫސުމީ ބަދަލުތަކާއި ތިމާވެއްޓާއި ހަކަތައާއި ބެހޭ ވުޒާރާގެ ފަރާތުން ސޮއިކުރެއްވީ ޕަރމަނަންޓް ސެކްރެޓަރީ އަޖުވަދު މުޞްޠަފާ އެވެ. އަދި ރިތަރިވަރކްސް ޕްރައިވެޓް ލިމިޓެޑްގެ ފަރާތުން ސޮއިކުރެއްވީ އެ ކުންފުނީގެ މެނޭޖިންގ ޑިރެކްޓަރ އަޙްމަދު ޝަރީފެވެ.

މި މަޝްރޫޢުގެ ސަބަބުން ދިވެހިރާއްޖޭގެ ޓްރާންސްޕޯޓު ދާއިރާއިން އުފެދޭ ގްރީންހައުސް ގޭހާއި ގުޅުންހުރި މަޢުލޫމާތުތައް އެއްކޮށް ބެލެހެއްޓުމަށް ހަރުދަނާ އަދި ރައްކާތެރި ނިޒާމެއް ޤާއިމުވެގެންދާނެއެވެ.