މޫސުމީ ބަދަލުތަކާއި ތިމާވެށްޓާ ގުޅުންހުރި މަޝްރޫޢުތައް ހިންގާނީ ފޮރުވުމެއްނެތި އެ މަޝްރޫޢުތަކުގެ މަޢުލޫމާތުތައް ހާމަކުރަމުން، ނަޒާޙަތްތެރިކަމާއެކު ކަމަށް ސްޕެޝަލް އެންވޯއީ ފޮރ ކްލައިމެޓް ޗޭންޖް ޢަލީ ޝަރީފް ވިދާޅުވެއްޖެއެވެ.
އޭސީސީއާއި ޓްރާންސްޕޭރެންސީ މޯލްޑިވްސް ގުޅިގެން ބާއްވާ އެންޓި ކޮރަޕްޝަން ފޯރަމް ފެށުމުގެ ރަސްމިއްޔާތުގައި ވާހަކަދައްކަވަމުން ޢަލީ ޝަރީފް ވިދާޅުވީ މޫސުމީ ބަދަލުތަކަށް ވިލުންތެރިވުމަށް ލިބޭ ފައިސާ، މި ސަރުކާރުން ޚަރަދުކުރާނީ ހާމަކަން ބޮޑު ގޮތެއްގައި ކަމަށެވެ. އަދި މަޝްރޫޢުތައް ކުރިއަށްގެންދާނީ ކަމާގުޅޭ މަޢުލޫމާތު ފޯރުކޮށްދީ، ޖަވާބުދާރީވަމުން ކަމަށްވެސް ޝަރީފް ވިދާޅުވިއެވެ.
"މޫސުމީ ބަދަލުތަކާގުޅޭ މުޢާހަދާތަކަށް ހުށައަޅަންޖެހޭ ރިޕޯޓުތައް އެބަހުރި ކްލައިމެޓް ފައިނެންސިންއާ ގުޅޭ. މި ރިޕޯޓުތައް ހުށައެޅުމުގައި ކުދި ޖަޒީރާ ޤައުމުތަކަށް ލުއިތަކެއް ދީފައި އެބަހުރި. އެހެންނަމަވެސް ބައިއެނިއަލް ޓްރާންސްޕޭރެންސީ ރިޕޯޓް، އެންމެ ފަހުވަގުތަށް މަނޑުނުކޮށް ބޮޑެތި ޤައުމުތަކެކޭ އެއްގޮތަށް ރާއްޖެއިން ވަނީ ހުށައަޅާފައި. މިކަމާގުޅޭ މަޢުލޫމާތު އަޅުގަނޑުމެން ބޭނުންވީ ވީހާވެސް އަވަހަކަށް ހާމަކުރަން." ޝަރީފް ވިދާޅުވިއެވެ.
Advertisement
މީގެ އިތުރުން ކޮރަޕްޝަނަށް މަގުފަހިނުވާ ގޮތަށް ހާމަކަން ބޮޑު ގޮތެއްގައި މި ސަރުކާރުން ޢަމަލުކުރަމުންދާކަންވެސް ޝަރީފް ފާހަގަކުރެއްވިއެވެ. އަދި މޫސުމީ ބަދަލުތަކާއި ތިމާވެށްޓާ ގުޅުންހުރި ކަންކަމުގައި ދައުލަތުންކުރާ ޚަރަދުތައް ހާމަކުރުމަށްވެސް ޚާއްސަ ފިޔަވަޅުތަކެއް މިހާރު އަޅަމުންދާ ކަމަށް ޝަރީފް ވިދާޅުވިއެވެ.
މި ފޯރަމް ކުރިއަށްދާނީ މިމަހުގެ 9 ވަނަ ދުވަހުން ފެށިގެން 10 ވަނަ ދުވަހާ ހަމައަށެވެ. މި ފޯރަމްގައި ކޮރަޕްޝަން ހުއްޓުވުމަށް ދިމާވާ ދަތިތައް ޙައްލުކުރުމަށް ކުރެވިދާނެ ކަންކަމާ ގުޅޭގޮތުން މުހިންމު މަޝްވަރާތަކެއް ކުރެވޭނެކަމަށް އޭސީސީން ބުންޏެވެ.
