ސްޕެނިޝް ލަ ލީގާގައި ރޭ ރިއަލް މެޑްރިޑުން 4-2 އިން ސެވިއްޔާ ބަލިކޮށް، ލީގުގެ އެއްވަނައިގައި އޮތް އެތްލެޓިކޯ މެޑްރިޑާއި ދެޕޮއިންޓް ކައިރިޔަށް ޖެހިލައިފިއެވެ. ހަފްތާގެ ހިމަކޮޅާއި ހަމަޔަށް އައި އިރުވެސް އެއްވަނައިގައި ވާދަވެރި ބާސެލޯނާ އޮތްއިރު އިއްޔެރޭ އެ ޓިމު ބަލިކޮށްލި އެތްލެޓިކޯ މެޑްރިޑުން ލީގުގެ އެއްވަނަޔަށް ޖެހިލިކަން ފާހަގަ ކުރެވެއެވެ.

އެހެންނަމަވެސް، ރޭ ސެވިއްޔާ އަތުން ލިބުނު މޮޅާއެކު ރިއަލް އިން ލީގުގެ ބޮންތިއަށް އެރިދާނެ ކަމުގެ ހެކި ދައްކާލީ ކިލިއަން އެމްބާޕޭގެ ކުޅުން ނުރައްކާވަމުން އަންނަކަން ކަށަވަރުކޮށްދެމުންނެވެ.

ރޭގެ މެޗުގެ ފުރަތަމަ ލަނޑު ޖެހީ ވެސް އެމްބާޕޭއެވެ. މެޗުގެ 10 ވަނަ މިނެޓުގައި ރޮޑްރިގޯ ދިން ބޯޅައަކުން އެމްބާޕޭ ވަރުގަދަ ހަމަލާއަކުން ސެވިއްޔާގެ ގޯލްކީޕަރު އަލްވާރޯ ފެނާންޑޭޒް ބަލަހައްޓަމުންދިޔަ ގޯލު ފޫއަޅުވާލިއިރު، އޭގެ ކުޑައިރުކޮޅެއް ފަހުން ފެޑެރިކޯ ވަލްވަރޑޭ ވެސް އެމްބާޕޭ ޖެހި ހިސާބުން ހަމަލާއެއް އަމާޒުކޮށް ގޯލުގެ މަތީ ކަނަށް ބޯޅަ ވައްދާލާ ރިއަލްގެ ދެވަނަ ލަނޑު ޖެހިއެވެ. ރޮޑްރިގޯ ރީތި ނިންމުމާއެކު ތިންވަނަ ލަނޑު ޖަހާފައި ވަނިކޮށް ސެވިއްޔާއިން އިސާކް ރޮމޭރޯ އޭގެ މިނެޓެއް ފަހުން އެ ޓީމުގެ ސުން ކަނޑުވާލިއެވެ.

ދެވަނަ ހާފު ފެށިގެން އަށް މިނެޓު ފަހުން އެމްބާޕޭ ދިން ރީތި ބޯޅައަކުން ބްރާހިމް ޑިއާޒް ރިއަލް ހަތަރުވަނަ ލަނޑު ޖެހިއެވެ. މެޗު ނިމުމުގެ ފަސް މިނެޓު ކުރިން ސެވިއްޔާގެ ޑޯޑީ ލުކެބަކިއޯ އެ ޓީމުގެ ދެވަނަ ލަނޑު ޖެހި ނަމަވެސް، މެޗު ނިމުނީ 4-2 އިން ރިއަލް މެޑްރިޑް މޮޅުވެގެންނެވެ.

ރޭގެ މެޗުގައި އެންމެ ގިނަ ހަމަލާ ގޯލަށް އަމާޒުކޮށްފައިވަނީ ވެސް އެމްބާޕޭއެވެ. ޖުމްލަ 5 ޝޮޓް ހެދިއިރު ވާދަވެރި ޓީމުގެ ޕެނަލްޓީ އޭރިއާއަށް 9 ފަހަރުމަތިން އެމްބާޕޭ ވަނެވެ.

^{އެމެބާޕޭ ރޭގެ މެޗުގައި ގޯލު ޖެހުމަށްފަހު އުފާފާޅުކުރަނީ}

މި އަހަރު އެމްބާޕޭ ވަނީ ޕީއެސްޖީ އާއި ރިއަލް މެޑްރިޑަށް ކުޅެ، ޖުމްލަ 49 ގޯލުގައި ބައިވެރިވެފައެވެ. ހެރީ ކޭން (50) ފިޔަވައި މިހިސާބަށް އާދެވުނު އިތުރު ކުޅުންތެރިޔަކު ނެތެވެ.

ކޯޗު އެންޗޮލޮއްޓީ ވަނީ އެމްބާޕާގެ ކުޅުމަށް ވަރަށް ބޮޑަށް ތަޢުރީފް ކޮށްފައެވެ.