އަފްޣާނިސްތާނުގައި ބުދަ ދުވަހު ހިނގި ނުރައްކާތެރި ދެ ބަސް އެކްސިޑެންޓުގައި އަންހެނުންނާއި ކުޑަކުދިން ހިމެނޭ ގޮތަށް 52 މީހުން މަރުވެ 68 މީހުން ޒަޚަމްވެއްޖެއެވެ.
ފްރާންސްގެ ނޫސް އެޖެންސީ އޭއެފްޕީ އިން ބުނާ ގޮތުގައި މި އެކްސިޑެންޓްތައް ހިނގާފައިވަނީ ޣަޒްނީ ޕްރޮވިންސްގެ ވެރިރަށް ކާބުލް އާއި ކަންދަހާރާ ދެމެދު އޮންނަ ހައިވޭއެއްގައެވެ
ޒަހަމްވި ބައެއް މީހުންގެ ހާލު ސީރިއަސް ކަމަށާއި އެމީހުންނަށް ފަރުވާ ދިނުމަށް ކާބުލްއަށް ފޮނުވާފައިވާ ކަމަށް ވެސް ޚަބަރުތައް ބުނާއިރު މަރުވި މީހުންގެ ތެރޭގައި ކުޑަކުދިންނާއި އަންހެނުންނާއި މުސްކުޅިން ހިމެނޭ' ކަމަށްވެސް ސަރުކާރުގެ ތަރުޖަމާނު ޒަބީހުالله މުޖާހިދު އެކްސްގައި ލިޔުއްވިއެވެ.
Advertisement
ޣަޒްނީގެ ޝެހްބާޒް އަވަށު ކައިރީގައި ބަހަކާއި ތެޔޮ ޓޭންކަރެއް ޖެހި އެކްސިޑެންޓް ހިނގިއިރު، އަނެއް އެކްސިޑެންޓް ހިނގީ އަންޑަރުގެ އިރުމަތީ ޑިސްޓްރިކްޓްގައި ބަހަކާއި ޓްރަކެއް ޖެހިގެން ކަމަށް ވެސް ތަރުޖަމާނު ވިދާޅުވިއެވެ.
އަފްޣާނިސްތާނުގައި ޓްރެފިކް އެކްސިޑެންޓްތައް އާންމުވެފައިވަނީ އެޤައުމުގެ މަގުތަކުގެ ހާލަތު ދަށްވުމާއި، ހައިވޭތަކުގައި ދުއްވާއިރު ވަރަށް ނުރައްކާތެރިކޮށް ދުއްވުމާއި، ގަވާއިދުތައް ދޯހަޅިވުމުގެ ސަބަބުންނެވެ
މާޗް މަހު ވެސް އެ ޤައުމުގައި ތެޔޮ ޓޭންކަރެއް ޖެހި އަލިފާން ރޯވެ 20 އަށް ވުރެ ގިނަ މީހުން މަރުވެ 38 މީހުން ޒަހަމްވެފައިވެ އެވެ. ޑިސެމްބަރު 2022 ގައި ހިނގި އިތުރު އެކްސިޑެންޓެއްގައި 31 މީހުން މަރުވެފައިވެ އެވެ.
