އެމްއޭސީއެލްއިން ސީއެޗްއެސްއީގެ ގްރޭޑް 11 ގެ އެންމެ މޮޅު 4 ދަރިވަރުންނަށް މެރިޓް އެވޯޑު މިއަދު ހަވާލުކޮށްފިއެވެ. މި އަހަރުގެ އެވޯޑު ލިބުނު ދަރިވަރުންނަކީ ޔަޝާ ޝާފީ ޝަފީގު، އަހުމަދު ރާއިފް ނަސީމް، ނިޝްރާ ވަހީދު އަދި އަލީ މާއިޒްއެވެ.

މި އެވޯޑުތައް ހަވާލުކޮށްދެއްވީ އެމްއޭސީއެލްގެ ސީއީއޯ އަދި މެނޭޖިން ޑިރެކްޓަރު އިބްރާހިމް ޝަރީފް މުހައްމަދެވެ. އެވޯޑު ދިނުމުގެ ރަސްމިއްޔާތުގައި ވާހަކަދައްކަވަމުން ސީއެޗްއެސްއީ-ހުޅުމާލޭގެ ޕްރިންސިޕަލް ޒުހުދުލް ހައްގު ވިދާޅުވީ، މި އެވޯޑުގެ ސަބަބުން ދަރިވަރުންގެ މެދުގައި ކިޔެވުމުގެ ރޫހު އިތުރުވެ، ވާދަވެރިކަން އިތުރުވެފައިވާ ކަމަށެވެ.

އެމްއޭސީއެލްގެ އެމްޑީ ޝަރީފް ވިދާޅުވީ، އެ ކުންފުނިން އެއާޕޯޓު ހިންގުމުގެ އިތުރުން މުޖުތަމައަށް ފައިދާ ހުރި ގިނަ މަސައްކަތްތަކެއް ކުރަމުން އަންނަ ކަމަށެވެ. އަދި މި އެވޯޑަކީ ވެސް އެފަދަ މަސައްކަތެއްގެ ތެރެއިން ތައާރަފުކުރެވުނު އެއްޗެއް ކަމަށް ވިދާޅުވިއެވެ.

އެމްއޭސީއެލް މެރިޓް އެވޯޑު ތައާރަފުކުރީ މިދިޔަ އަހަރެވެ. ކޮންމެ އަހަރަކު ވެސް މި އެވޯޑު ދެނީ ސީއެޗްއެސްއީގެ ގްރޭޑް 11 ގެ އެންމެ މޮޅު ހަތަރު ދަރިވަރަކަށެވެ. މި އެވޯޑުގެ މަޤްސަދަކީ ދަރިވަރުންގެ މެދުގައި ވާދަވެރިކަން އުފައްދައި، ކިޔެވުމަށް ހިތްވަރުދިނުމެވެ.