ފެނަކައިގެ މެނޭޖިންގ ޑިރެކްޓަރ މުއާޒް މުޙައްމަދު ރަޝީދު، 14 މިލިއަން ރުފިޔާއަށް މަސްދޯންޏެއް ބަންނަ ކަމަށް ބުނާ ޚަބަރު އޭނާ ދޮގުކުރައްވައިފިއެވެ.

އޮންލައިން ނޫހެއްގައި ޝާއިޢުކޮށްފައިވާ ޚަބަރެއްގައި ވަނީ ފެނަކައަށް މުދާ ވިއްކާ ކުންފުނިތަކުން ކަޓުގެ ގޮތުގައި މިލިއަނުން ފައިސާ ނެގުމަށްފަހު، 115 ފޫޓުގެ ފައިބަރު މަސް ދޯންޏެއް ބަންނަން މުއާޒް ފައްޓަވާފައިވާ ކަމަށެވެ.

އެ ދޯނި ބަންނަން ފެށީ މި މަހުގެ 14 ވަނަ ދުވަހު ކަމަށާއި އެ މަސައްކަތް ޙަވާލުކޮށްފައިވަނީ މުއާޒްގެ އުފަން ރަށް ގދ. މަޑަވެލީ މީހަކާ ކަމަށާއި، އެ ދޯނި ބަނުމުގެ މަސައްކަތް ކުރަމުން އަންނަނީ ހޯނޑެއްދޫގައި ކަމަށްވެސް އެ ޚަބަރުގައި ރިޕޯޓުކޮށްފައިވެއެވެ. އަދި ދޯނި ބަނުމަށްޓަކައި މުއާޒް ވަނީ 14 މިލިއަން ރުފިޔާ އެއްފަހަރާ ދައްކާފައި ކަމަށްވެސް ޚަބަރުގައި ބުނެފައިވެއެވެ.

މި ޚަބަރާ ގުޅޭ ގޮތުން މުއާޒް ސޯޝަލް މީޑިއާގައި ކުރެއްވި ޕޯސްޓެއްގައިވަނީ އެ ޚަބަރުގައިވާ ވާހަކަތައް ދޮގުކުރައްވާފައެވެ. އަދި އެއީ ތެދު ޚަބަރަކަށް ވާނަމަ، ޚަބަރު ލިޔުނު މީހާއަށް އެ ދޯނި ދީފިކަމަށް މުއާޒް ވަނީ ވިދާޅުވެފައެވެ.

"މިއީ ތެދު ޚަބަރަކަށް ވެއްޖެޔާ މި ދޯނި މި ޚަބަރު ލިޔުނު މީހަކަށް ދީފިން. ލިޔުމެއް ލިޔެގެން ހިލޭ 14 މިލިއަނުގެ ދޯންޏެއް ތި ލިބުނީ." މުއާޒް ވަނީ މިހެން ވިދާޅުވެ، އެ ޚަބަރު ލިޔުނު މީހާއަށް މަރުޚަބާވެސް ވިދާޅުވެފައެވެ.