ގަތަރުގައި ކުރިއަށްދިޔަ ފީފާ އިންޓަކޮންޓިނެންޓަލް ކަޕްގެ ފައިނަލުގައި ސްޕެއިންގެ ރިއަލް މެޑްރިޑުން މެކްސިކޯގެ ޕަޗޫކާ 3-0 ގެ ނަތީޖާއަކުން ބަލިކޮށް، ޗެމްޕިއަންކަން ހޯދައިފިއެވެ.

ގަތަރުގެ ލުސައިލް ސްޓޭޑިއަމްގައި ރޭ ކުޅުނު މެޗުގައި ރިއަލް މެޑްރިޑަށް ފުރަތަމަ ގޯލު ޖަހައިދިނީ ފްރާންސްގެ ތަރި ކިލިއަން އެމްބާޕޭއެވެ. އޭނާ މި ގޯލު ޖެހީ ވިނީޝިއަސް ޖޫނިއާ ދިން ބޯޅައަކުން، ޕަޗޫކާގެ ގޯލްކީޕަރުގެ ގައިން ނައްޓުވާލުމަށްފަހުއެވެ.

ދެވަނަ ހާފުގެ ކުރީކޮޅު ރިއަލް މެޑްރިޑުން ލީޑު ފުޅާކުރިއެވެ. މި ގޯލު ޖެހީ ރޮޑްރީގޯއެވެ. މެޗުގެ ތިންވަނަ އަދި ފަހު ގޯލު ޖެހީ ވިނީޝިއަސް ޖޫނިއާއެވެ.

މި މެޗުގައި ޕަޗޫކާއަށް އެންމެ ނުރައްކާތެރި ފުރުސަތު ލިބުނީ އެ ޓީމުގެ ކެޕްޓަން ސަލޮމޮން ރޮންޑޮން އަށެވެ. ނަމަވެސް އެ ބޯޅަ ހުއްޓުވީ ރިއަލް މެޑްރިޑްގެ ގޯލްކީޕަރު ތީބޯ ކޯޓުއާއެވެ.

ފީފާ އިންޓަކޮންޓިނެންޓަލް ކަޕަކީ އާ ކްލަބު ވޯލްޑް ކަޕް ފޯމެޓާއެކު ބައްރުތަކުގެ ޗެމްޕިއަނުން ވާދަކުރާ މުބާރާތެކެވެ. މި މުބާރާތުގައި ޖުމުލަ ހަ ޗެމްޕިއަނުން ވާދަކުރިއެވެ. ކުރިން އަހަރަކު އެއްފަހަރު ބާއްވަމުން އައި ކްލަބު ވޯލްޑް ކަޕްގެ ބަދަލުގައި، މިހާރު ފީފާއިން ނިންމާފައިވަނީ މި މުބާރާތް ކޮންމެ އަހަރަކު ބޭއްވުމަށެވެ.