ހޮލީވުޑްގެ މަޝްހޫރު ތަރި ޖެކީ ޗޭންގެ ފިލްމު ސިލްސިލާ "ކަރާޓޭ ކިޑްސް" ގެ ހަވަނަ ބައިގެ ޓްރެއިލަރ އިއްޔެ ބެލުންތެރިންނަށް ދައްކާލައިފިއެވެ. "ކަރާޓޭ ކިޑްސް: ލެޖެންޑްސް" ގެ ނަމުގައި ނެރެފައިވާ މި ފިލްމަކީ 100 މިލިއަން ޑޮލަރުގެ ބޮޑު ބަޖެޓަކުން ތައްޔާރުކޮށްފައިވާ ފިލްމެކެވެ.

މި ފިލްމުގެ މައިގަނޑު ރޯލުތަކުގައި ފެންނާނީ ރާފް މަޗިއޯ، ބެން ވެންގް، ޖޯޝުއާ ޖެކްސަން އަދި ޝަނައުޓް ރެނީ ވިލްސަން ފަދަ މަޝްހޫރު ތަރިންނެވެ. މި ފިލްމަކީ މާޝަލް އާޓްސް ޑްރާމާ ފްރެންޗައިޒް "ކަރާޓޭ ކިޑްސް" ގެ އެންމެ ފަހުގެ ފިލްމެވެ.

"ކަރާޓޭ ކިޑްސް" ސިލްސިލާގެ އެންމެ ފަހުން ނެރުނު ފިލްމަކީ 2010 ވަނަ އަހަރު ނެރުނު "ދަ ކަރާޓޭ ކިޑް" އެވެ. ހެރާލްޑް ޒްވާޓް ޑައިރެކްޓްކުރި މި ފިލްމު ހެދީ 40 މިލިއަން ޑޮލަރުގެ ބަޖެޓަކުންނެވެ. އަދި މި ފިލްމުން ބޮކްސް އޮފީހުގައި 359.1 މިލިއަން ޑޮލަރުގެ ބޮޑު އާމްދަނީއެއް ހޯދިއެވެ.

ޗައިނާގައި އުފަންވެފައިވާ ޖެކީ ޗޭންއަކީ މިހާތަނަށް ވަރަށް ކާމިޔާބު ގިނަ ފިލްމުތަކެއް ކުޅެފައިވާ ތަރިއެކެވެ. އޭނާގެ އެންމެ ފަހުގެ ފިލްމަކީ މިއަހަރުގެ ޖުލައި މަހު ނެރުނު ފެންޓަސީ އެކްޝަން ފިލްމު "އަ ލެޖެންޑް" އެވެ.

"ކަރާޓޭ ކިޑްސް: ލެޖެންޑްސް" ގެ ޓްރެއިލަރ ދޫކޮށްލުމާއެކު، މި ފިލްމު ރިލީޒްކުރާނެ ތާރީޚުވެސް ވަނީ ހާމަކޮށްފައެވެ. އެގޮތުން މި ފިލްމު ރިލީޒްކުރުމަށް ހަމަޖެހިފައިވަނީ މިއަންނަ އަހަރުގެ މެއި މަހުގެ 30 ވަނަ ދުވަހުއެވެ.

މި ފިލްމަކީ ކުރީގެ ފިލްމުތަކެކޭ އެއްފަދައިން ބޮކްސް އޮފީހުގައި ރެކޯޑުތަކެއް ހަދާނެ ފިލްމަކަށް ވެދާނެކަމަށް ގިނަ ބަޔަކު ލަފާކުރެއެވެ.