ރާއްޖޭގެ ފުޓުބޯޅަ ސީޒަން އަންނަ މަހު ފެށޭނެކަމުގެ އުއްމީދު ކުޑަވުމާއި ގުޅިގެން، މާޒިޔާ ސްޕޯޓްސް އެންޑް ރެކްރިއޭޝަނުން އެ ޓީމުގެ ފަރިތަކުރުންތައް މެދުކަނޑާލައިފިއެވެ. މާޒިއާއިން ބުނީ ފުޓްބޯޅަ އެސޯސިއޭޝަން އޮފް މޯލްޑިވްސް (އެފްއޭއެމް) އިން ދީފައިވާ ތާރީޚުގައި ސީޒަން ފެށޭނެކަމުގެ ޔަގީން ކަމެއް ނެތެވެ.
އެފްއޭއެމުން ފުރަތަމަ ޑިވިޝަނުގެ ކްލަބްތަކަށް ފޮނުވާފައިވާ ޑްރާފްޓް ކަލަންޑަރުގައިވާ ގޮތުން، ޖެނުއަރީ 24 ވަނަ ދުވަހު ސީޒަން ފެށުމަށް ހަމަޖެހިފައިވެއެވެ. މި ކަލަންޑަރަށް ބެލުމަށްފަހު، މާޒިޔާއިން މިދިޔަ މަހުގެ 27 ވަނަ ދުވަހު ފަރިތަކުރުންތައް ފަށާފައިވެއެވެ. ނަމަވެސް، އަންނަ މަހު ސީޒަން ފެށޭނެކަމުގެ މަންޒަރު ނުފެންނާތީ، ޕްރީ-ސީޒަން ޕްރެކްޓިސް ބްރޭކެއް ނެގުމަށް ކުލަބުގެ މެނޭޖްމަންޓުން ނިންމާފައިވާ ކަމަށް މާޒިޔާގެ އޮފިޝަލު ވިދާޅުވިއެވެ.
ކޮންމެ ސީޒަނަކަށްވެސް އެންމެ ފުރަތަމަ ފަރިތަކުރުންތައް ފަށާ ޓީމުގެ ގޮތުގައި މާޒިޔާ ފާހަގަކުާހަގަކުރެވެއެވެ. އެފްއޭއެމުގެ ޑްރާފްޓް ކަލަންޑަރު ކުލަބުތަކާއި ހިއްސާކުރިތާ މާ ގިނަ ދުވަސްތަކެއް ނުވަނީސް މާޒިޔާއިން ވަނީ ފަރިތަކުރުންތައް ފަށާފައެވެ.
Advertisement
މީގެ އިތުރުން، ސީޒަން ފެށޭނެ ދުވަހެއް ޔަގީން ނުވާތީ، މާޒިޔާއިން ވަނީ އެ ޓީމުގެ ކޯޗު، ސާބިއާގެ ޑްރަގަން ޑުކަނޯވިޗްއަށް ޗުއްޓީއެއްވެސް ދީފައެވެ. މި ޗުއްޓީއާއެކު ކޯޗު އެނބުރި އޭނާގެ ގައުމަށް ދިއުމަށް ނިންމާފައިވާ ކަމަށްވެސް އެ ކުލަބުން ބުނެފައިވެއެވެ.
މާޒިޔާއިން ވަނީ އޮކްޓޫބަރު މަހުގެ ފަހުކޮޅާއި ނޮވެމްބަރު މަހުގެ ކުރީކޮޅުގައި ކުޅުނު އޭއެފްސީ ޗެލެންޖް ލީގުގައި ބައިވެރިވެފައެވެ. ނަމަވެސް، މި މުބާރާތާއި މާޒިޔާއިން ކުރިމަތިލީ ރަނގަޅު ފެންވަރެއްގެ މެޗުތަކެއް ނުލިބި، ދަތި ހާލުގައެވެ.
