މާލޭގެ ސަރުކާރުގެ ވުޒާރާތަކެއް ހިންގަމުންދިޔަ ސަރަޙައްދެއްގައި މިއަދު ހިނގި އަލިފާނުގެ ހާދިސާއާ ގުޅިގެން 44 ވަނަ މަސްވެރިންގެ ދުވަހުގެ ޚާއްސަ ޙަފްލާ ފަސްކޮށްފިއެވެ.
މަސްވެރިކަމާބެހޭ ވުޒާރާއިން މިއަދު ނެރުނު ބަޔާނެއްގައި ބުނެފައިވަނީ، މާދަމާ ރޭ ދަރުބާރުގޭގެ ރަންނަބަނޑޭރި މާލަމުގައި ބޭއްވުމަށް ހަމަޖެހިފައިވާ ރަސްމީ ޙަފްލާ ފަސްކުރަން ނިންމާފައިވާ ކަމަށެވެ. އަދި މި ޙަފްލާއަށް ދައުވަތު އެރުވިފައިވާ ފަރާތްތަކަށް ޙަފްލާ ބާއްވާނެ އައު ތާރީޚެއް ފަހުން އަންގާނެ ކަމަށްވެސް އެ ވުޒާރާއިން ބުންޏެވެ.
މިއަދުގެ އަލިފާނުގެ ހާދިސާ ހިނގާފައިވަނީ އަމީނީ މަގުގައި ހުންނަ ހައުސިންގ މިނިސްޓްރީ އާއި ކޮންސްޓްރަކްޝަން މިނިސްޓްރީގައެވެ. މި ހާދިސާގައި އެ ދެ ޢިމާރާތް ބޭނުން ނުކުރެވޭ ވަރަށް ވަނީ އަނދާފައެވެ. މީގެ އިތުރުން، ކައިރީގައި ހުންނަ ގްރީން ބިލްޑިންގ އަށްވެސް އަލިފާނުގެ ސަބަބުން ގެއްލުން ލިބިފައިވެއެވެ. މި އިމާރާތަކީ އެންވަޔަރަމަންޓް މިނިސްޓްރީ އާއި އެންވަޔަރަމަންޓަލް ޕްރޮޓެކްޝަން އެޖެންސީ (އީޕީއޭ) ހިންގަމުން އަންނަ އިމާރާތެވެ.
