އާސަންދައިގެ ދަށުން ހިދުމަތް ދިނުމަށް ޔޫއޭއީގެ ދުބާއީ އާއި ތައިލެންޑުގެ ބެންކޮކްގެ ތިން ހޮސްޕިޓަލަކާއި އެކު މިއަދު ސޮއިކޮށްފި އެވެ.
އާސަންދައިން ބުނީ އެ ތިން ހޮސްޕިޓަލާއި އެކު ސޮއިކުރުމުން، ކަނޑައެޅޭ އުސޫލުގެ ތެރެއިން އަންނަ މަހުގެ 15 އިން ފެށިގެން ފަރުވާއަށް މީހުން ފޮނުވަން ފަށާނެ ކަމަށެވެ.
ދުބާއީގެ އެއް ހޮސްޕިޓަލް އަދި ބެންކޮކްގެ ދެ ހޮސްޕިޓަލަކުން އާސަންދައިގެ ހިދުމަތް ދިނުމުގެ އެއްބަސްވުމުގައި ސޮއިކުރެއްވީ އާސަންދަ ކުންފުނީގެ މެނޭޖިން ޑިރެކްޓަރު އާމިނަތު ޒީނިޔާ އެވެ. އެ ހޮސްޕިޓަލުތަކުގެ ފަރާތުން ސޮއިކުރެއްވީ އެ ތަންތަނުގެ އިސްވެރިންނެވެ.
Advertisement
އާސަންދައިގެ ދަށުން ހިދުމަތް ލިބޭނީ ދުބާއީގެ ބުރްޖީލް މެޑިކަލް ސިޓީ އާއި ބެންކޮކްގެ ވޯލްޑް މެޑިކަލް ހޮސްޕިޓަލް އަދި ބެންކޮކް ހޮސްޕިޓަލުންނެވެ.
ޗައިނާގެ ރައީސް ޝީ ޖިންޕިންގެ ދައުވަތަކަށް މިދިޔަ ޖެނުއަރީ މަހު އެ ގައުމަށް ކުރެއްވި ފުރަމާނަ ދަތުރުފުޅު ނިންމަވާލެއްވުމަށް ފަހު ރާއްޖެ ވަޑައިގެންނެވި ދުވަހު ރައީސް ޑރ. މުހައްމަދު މުއިއްޒު ވަނީ ތައިލެންޑާއި ދުބާއީން ދިވެހިންނަށް އާސަންދަ ސްކީމުގެ ދަށުން ބޭސްފަރުވާ ކުރެވޭނެ އިންތިޒާމު ހަމަޖެއްސުމަށް ސަރުކާރުން މަސައްކަތްކުރަމުން އަންނަކަން އިއުލާންކުރައްވައިފަ އެވެ.
ރައީސް ޑރ. މުއިއްޒު ވިދާޅުވެފައި ވަނީ އާސަންދައަކީ "ހަމައެކަނި ވަކި ދިމާއެއްގައި" އޮންނަ ވަކި ގައުމެއްގައި ހުންނަ މެޑިކަލް ފެސިލިޓީތަކަށް އެކަނި ގޮސްގެން ލިބޭ ހިދުމަތަކަށް ވާން އެމަނިކުފާނު ބޭނުންފުޅު ނުވާ ކަމަށެވެ. އެހެންވެ، ފެންވަރު ރަނގަޅު ގައުމުތަކަށް އާސަންދައިގެ ހިދުމަތް ފުޅާކުރައްވާނެ ކަމަށް ވިދާޅުވި އެވެ.
