މޯލްޑިވްސް އިންލެންޑް ރެވެނިއު އޮތޯރިޓީ (މީރާ)ގެ ޑިރެކްޓަރުންގެ ބޯޑަށް ކުރިމަތިލެއްވި ފަސް ބޭފުޅެއްގެ ނަން ދިރާސާ ކުރުމަށް ރައްޔިތުންގެ މަޖިލީހުގެ ކަމާއި ގުޅުން ހުރި ދާއިމީ ކޮމިޓީއަށް ފޮނުވައިފިއެވެ.

މީރާގެ ޑިރެކްޓަރުންގެ ބޯޑަށް މެންބަރަކު އައްޔަނުކުރުމަށް ހުޅުވާލި ފުރުސަތުގައި ކުރިމަތިލެއްވި ބޭފުޅުންގެ ތެރެއިން ޝަރުތު ހަމަވާ ފަސް ބޭފުޅެއްގެ ނަން ވަނީ މަޖިލީހަށް ފޮނުއްވާފައެވެ. އެ ފަސް ބޭފުޅުންނަކީ:

1. ދަހާ ޝުއައިބް، ހ. ކެރީބިއަން

2. އަހުމަދު ފާއިޒް މުހައްމަދު، އަސްރަފީހިޔާ، ލ. މާވަށް

3. އަބްދުﷲ އިމްރާން، މާލަމް، ރ. ހުޅުދުއްފާރު

4. އަލްއުސްތާޒު މަހުޒޫމް ސަލީމް، ޝަބްނަމްގެ، ކ. ކާށިދޫ

5. އައިމިނަތު އާފިޔާ، ދަފްތަރު ނަންބަރު ރ.ސ. 13462

މަޖިލީހުގެ ރައީސް ވަނީ މި ނަންތައް ޝަރުތު ހަމަވާ މެންބަރުންގެ ތަރުތީބުން ހުށަހަޅުއްވާފައިވާ ކަން ފާހަގަ ކުރައްވައި، މަޖިލީހުން ދިރާސާކުރުމަށްފަހު އޭގެތެރެއިން ބޭފުޅަކަށް އެ މަޤާމަށް ރުހުން ދިނުމަށް އެދިވަޑައިގެންފައެވެ. މި މައްސަލަ ދިރާސާ ކުރުމަށް ރިޔާސަތުން ވަނީ މަޖިލީހުގެ އިޤްތިޞާދީ ކޮމިޓީއަށް ފޮނުއްވާފައެވެ.

މީރާގެ ބޯޑު މެންބަރުކަމުގެ މަޤާމަށް ކުރިމަތިލުމުގެ ފުރުސަތު ހުޅުވާލީ މިދިޔަ މަހުގެ 17 ވަނަ ދުވަހުއެވެ. މީރާގެ ބޯޑުގައި މި ވަގުތު ހަތް މެންބަރުން ތިއްބަވައެވެ. އެއީ ކޮމިޝަނަރ ޖެނެރަލް އޮފް ޓެކްސޭޝަން ހަސަން ޒަރީރު، ޑެޕިއުޓީ ޗެއަރޕާސަން ލީނާ މުހައްމަދު ޒާހިރު ހުސައިން، ޗެއަރޕަސަން އަހުމަދު ސާއިދު މުސްތަފާ، މެންބަރު އައިޝަތު އަޝާ އަލީ، މެންބަރު މަހްޒޫމް ސަލީމް އަދި މެންބަރު މުމްތާޒް އަބްދުއްރަޝީދުގެ އިތުރުން މެންބަރު ހުޝާމް ވަހީދެވެ.