ބ އަދި ޅ އަތޮޅުގެ ސްކޫލުތަކުގެ އިސްވެރީންނަށް ލީޑަރޝިޕް އެންހޭންސްމެންޓް ވޯކްޝޮޕެއް ފަށައިފިއެވެ.
ދެ ދުވަހުގެ މުއްދަތަކަށް އޭދަފުށީ ސްކޫލުގައި ކުރިއަށްދާ މި ވޯކްޝޮޕްގައި މި ދެ އަތޮޅުގެ 16 ސްކޫލަކުން ޕްރިންސިޕަލުންނާއި ލީޑިންގ ޓިޗަރުން ހިމެނޭހެން ޖުމްލަ 49 ބޭފުޅުން ބައިވެރިވެލައްވާ ކަމަށް އެޑިއުކޭޝަން މިނިސްޓްރީން ބުންޏެވެ.
މިނިސްޓްރީން ބުނީ މި ވޯކްޝޮޕްގެ ސެޝަންތައް ނަންގަވައިދެއްވަނީ ސްރީލަންކާގެ ނެޝަނަލް އިންސްޓިޓިއުޓް އޮފް އެޑިޔުކޭޝަންގެ ޑިރެކްޓަރ ޖެނެރަލް ޕްރޮފެސަރ ޕްރަސާދު ސެތުންގާ ކަމަށެވެ.
Advertisement
މި ވޯކްޝޮޕްގެ މައިގަނޑު މަޤްޞަދަކީ ސްކޫލުތައް ހިންގުމުގައި ބޭނުންކުރާ ޒަމާނީ އާ ގޮތްތަކާއި، އާ އީޖާދުތަކާ ގުޅޭ މަޢުލޫމާތު ޕްރިންސިޕަލުންނަށް ޙިއްޞާކޮށް، އެކަންކަމަށް އަހުލުވެރިކުރުވުން ކަމަށް މިނިސްޓްރީން ބުންޏެވެ.
މީގެ އިތުރުން، މި ވޯކްޝޮޕްގެ ސަބަބުން ބައިވެރިންގެ މެދުގައި ރަނގަޅު ނެޓްވޯކެއް އުފެދި، ކުރިމަގުގައި އެއްބަޔަކު އަނެއްބަޔަކަށް އެހީތެރިވެ، މަޢުލޫމާތު ޙިއްޞާކުރުމަށް މަގުފަހިވެގެންދާނެ ކަމަށް މިނިސްޓްރީން ބުންޏެވެ.
މި ސިލްސިލާގެ ވޯކްޝޮޕްތައް މިހާތަނަށް ވަނީ ގދ، ގއ، ކ، މާލެ ސިޓީ، އައްޑޫ ސިޓީ، ފުވައްމުލަކު ސިޓީ، ގެ އިތުރުން އއ، ވ، މ، ފ، ދ އަދި ރ އަތޮޅުގައި ވެސް ކުރިއަށް ގެންގޮސްފައެވެ.
