އަބޫ މުޙައްމަދުލް ޖޫލާނީ (ކުރީގެ ފޮޓޯއެއް)
ސީރިއާގެ އިދިކޮޅު ލީޑަރު އަބޫ މުޙައްމަދުލް ޖޫލާނީ (އަހްމަދުއްޝަރުއު)އެ ޤައުމަށް އަތްގަދަ ކުރުމާއިއެކު މިނިވަން އިންތިޚާބެއް ބޭއްވުމަށް ބޮޑުވަޒީރު މުހައްމަދު އަލް ޖަލާލީ ގޮވާލައްވައިފިއެވެ.
Advertisement
އަލް އަރަބިއްޔާއަށް ދެއްވި އިންޓަވިއުއެއްގައި އަލް ޖަލާލީ ވިދާޅުވީ އިދިކޮޅު ކޮމާންޑަރު އަބޫ މުޙައްމަދު ޖޫލާނީއާއި ގުޅިގެން މިހާރުގެ ވަގުތީ މެނޭޖްމަންޓާ ބެހޭ ގޮތުން މަޝްވަރާ ކޮށްފައިވާ ކަމަށެވެ. ޚަބަރުތައް ބުނާ ގޮތުގައި ބޮޑުވަޒީރާއި ހަނގުރާމަވެރިންނާ ދެމެދު ވަރަކަށް އެއްބާރުލުން އެބައޮތެވެ. އަނެއްކޮޅުން އެމެރިކާގެ ބައިޑަން ސަރުކާރު ވަނީ ތުރުކީގެ ރައީސް ރަޖަބް ޠޮއްޔިބް އެރްދޮޣާން އަށް ގުޅުއްވައި ސީރިއާގެ މައްސަލައާއި ބެހޭގޮތުން ވާހަކަފުޅު ދައްކަވާފައެވެ. އެކަމުގެ ތަފްޞީލެއް އަދި މީޑިއާއަށް ހާމައެއް ނުކުރެއެވެ. ބައެއް ޚަބަރުތައް ބުނާގޮތުގައި މި ހަމަނުޖެހުމުގެ ފަހަތުގައި އޮތީ އެރްދޮޣާންގެ ސަރުކާރެވެ.
ސިފައިންނަށް ސަރުކާރުގެ މުއައްސަސާތަކަށް ވަނުން މަނާ:
ހަޔާތު ތަހުރީރު އަލް ޝާމްގެ ވެރިޔާ އަދި ކުރީގެ އަލްޤައިދާގެ ލީޑަރު އަބޫ މުޙައްމަދު އަލް ޖޫލާނީ ވަނީ ދިމިޝްގުގެ ސަރުކާރުގެ މުއައްސަސާތަކަށް ނުވަދެވޭ ގޮތަށް ސީރިއާގެ ސިފައިންނަށް އަމުރުކޮށްފައެވެ. އޭނާ ވިދާޅުވީ އެ މުއައްސަސާތައް ބޮޑުވަޒީރާއި "ރަސްމީކޮށް" ހަވާލުކުރެވެންދެން އެ މުއައްސަސާތައް ބޮޑުވަޒީރުގެ ދަށުގައި ދެމިތިބޭނެ ކަމަށެވެ.
ބޮޑުވަޒީރު އަލް ޖަލާލީ ވަނީ ރައްޔިތުން ހޮވާ ކޮންމެ ލީޑަޝިޕަކަށް އެއްބާރުލުން ދިނުމަށް ތައްޔާރަށް ހުރި ކަމަށް ވިދާޅުވެފައެވެ. އޭނާ ފޭސްބުކްގައި ވިދާޅުވެފައިވަނީ "މި ގައުމަކީ އަވަށްޓެރިންނާއި ދުނިޔެއާއި ރަނގަޅު ގުޅުންތަކެއް ބިނާކުރާ އެހެން ގައުމުތަކެކޭ އެއްފަދައިން ގައުމަކަށް ވެދާނެ" ކަމަށެވެ.
ދައުލަތުގެ ޓީވީން ބުނީ ކީކޭ؟
މި ހުރިހާ ކަމެއް ހިނގަމުންދަނީ ސީރިއާގެ ވެރިކަމުގައި ބޮޑެތި ބަދަލުތަކެއް އަންނަމުންދާ ދަނޑިވަޅެއްގައެވެ. ދައުލަތުގެ ޓީވީން ވަނީ ރައީސް ބައްޝާރުލް އަސަދު ވެރިކަމުން ދުރުކޮށް، ޖަލުތަކުގައި ތިބި ހުރިހާ ގައިދީން ދޫކޮށްލާފައިވާ ކަމަށް ބުނެ ބަޔާނެއް ގެނެސްދީފައެވެ. އަދި ހަނގުރާމަވެރިން ބުނާ ގޮތުގައި އެމީހުން ވަނީ ވެރިރަށް ދިމިޝްގުއަށް ވަދެ، ސައިދުނާޔާ ޖަލުން ގައިދީން މިނިވަންކޮށްފައެވެ.
ޖޫލާނީ ބޭނުންފުޅުވަނީ މެދުމިނުގެ އިސްލާމީ ވެރިކަމެއް
އަބޫ މުޙައްމަދުލް ޖޫލާނީ (މިހާރުގެ ފޮޓޯއެއް)
ސީރިއާގެ އިދިކޮޅު ހަނގުރާމަވެރިންގެ ލީޑަރު އަދި ކުރީގެ ޖަބްހަތުއްނުސްރާގެ ލީޑަރު އަބޫމުހައްމަދުލް ޖޫލާނީ ވަނީ ކުރިން ގެންގުޅުނު ވިސްނުން ދޫކޮށް، މެދުމިނުގެ އިސްލާމީ އަދި ގައުމީ ފިކުރަކަށް ބަދަލުވެފައިވާ ކަމަށް ބުނެފައެވެ.
42 އަހަރުގެ ޖޫލާނީ އަކީ ކުރިން ޖަބްހަތުއްނުސްރާގެ ވެރިއެކެވެ. އޭނާ މިހާރު ވިދާޅުވާ ގޮތުގައި އޭނާގެ ޒަޢާމަތުގައި ސީރިއާގައި ބިނާކުރަނީ އިސްލާމީ އާންމު ފިކުރުގެ މައްޗަށް ބިނާވެފައިވާ ޒަމާނީ މުއައްސަސާތަކުގެ ދައުލަތެކެވެ. އަދި ސީރިއާގެ ހުރިހާ މަޒްހަބުތަކެއްގެ މީހުންނަށް އަމާންކަމާއެކު ދިރިއުޅެވޭނެ މާހައުލެއް ގާއިމުކުރާނެ ކަމަށް ވިދާޅުވިއެވެ.
ޖޫލާނީގެ މި ބަދަލާއެކު، އޭނާގެ ފަހަތުގައި މިހާރު ތިބީ އިލްމާނީ ފިކުރާއި އަރަބި ގައުމީ ފިކުރުގެ ޖަމާޢަތްތަކުގެ މީހުންވެސް ކަމަށް ބެލެވެއެވެ. އަދި އެމެރިކާގެ މީޑިއާތަކުންވެސް މިހާރު ޖޫލާނީގެ އިންޓަވިއުތައް ގެނެސްދޭ ކަމަށް ވެއެވެ.
މި ބަދަލުތަކާއެކު، ސީރިއާގެ އިދިކޮޅު ހަނގުރާމަވެރިން ވަނީ ގިނަ ޕްރޮވިންސްތަކެއް އެމީހުންގެ ބާރުގެ ދަށަށް ގެނެސްފައެވެ. އަދި ރައީސް ބައްޝާރުލް އަސަދު ވެރިކަމުން ފިއްލަވާފައިވާ ކަމަށް ބެލެވެއެވެ. ޖޫލާނީ ވަނީ ބައްޝާރުގެ ވެރިކަމުގެ ނިޒާމުގައި ބައިވެރިވި ފަރާތްތަކަށް ރައްކާތެރިކަން ދޭނެ ކަމަށް ބުނެފައެވެ.
ސީރިއާގެ މި ބަދަލުތަކާއި ގުޅިގެން، ރަޝިއާ އާއި އީރާން ވެސް ވަނީ އިދިކޮޅު ފަރާތްތަކާއި ގުޅިގެން މަސައްކަތްކުރަން ތައްޔާރަށް އޮތްކަން ހާމަކޮށްފައެވެ. އަދި ޖޫލާނީގެ ފަހަތުގައި ތުރުކީ ވާކަމަށް ވެސް ބެލެވެއެވެ.
