މިދިޔަ ސަރުކާރުން ފަސް އަހަރުތެރޭގައި އެކިއެކި އިންތިޚާބުތަކާއި ދިމާކޮށް 1،900 ކުށްވެރިން މިނިވަންކޮށްފައިވާ ކަމަށް ރައީސް ޑރ. މުޙައްމަދު މުޢިއްޒު ވިދާޅުވެއްޖެއެވެ.
އއ. އަތޮޅާއި ކ. އަތޮޅަށް ފެއްޓެވި ދަތުރުފުޅުގެ ތެރެއިން ތޮއްޑޫ ރައްޔިތުންނާއި ބައްދަލުކުރައްވައި ވާހަކަފުޅު ދައްކަވަމުން އެމަނިކުފާނު ވަނީ، މިދިޔަ ސަރުކާރުން ކުށްވެރިން މިނިވަންކުރި ދުވަސްވަރާއި އަދަދުތައް ހާމަކުރައްވާފައެވެ.
ރައީސް ހާމަކުރެއްވި ގޮތުގައި:
- ރިޔާސީ އިންތިޚާބާ ދިމާކޮށް މިދިޔަ އަހަރު 429 ކުށްވެރިން
- 2022 ވަނަ އަހަރު 256 ކުށްވެރިން
- ކައުންސިލް އިންތިޚާބާ ދިމާކޮށް 2021 ވަނަ އަހަރު 458 ކުށްވެރިން
- 2019 ވަނަ އަހަރު 762 ކުށްވެރިން މިނިވަންކޮށްފައިވެއެވެ.
ރައީސް ޑރ. މުޢިއްޒު ވިދާޅުވީ މަގުމަތީގައި ހިންގާ ނުރައްކާތެރި އަނިޔާވެރިކަން ހިނގަމުން އަންނަނީ ކުށްވެރިން ރިހިބިލިޓޢޓް ނުކޮށް މިގޮތަށް ދޫކޮށްލުމުން ކަމަށެވެ. "އެކި އިންތިޚާބުތަކާއި ދިމާކޮށް ޖަލުތަކުގައި ތިބޭ ކުށްވެރިން އެއްވެސް ވަރެއްގެ ރިހެބިލިޓޭޝަނެއްގެ ތެރެއަށް ނުގޮސް މަގުމައްޗަށް ދޫކޮށްލާތަން. އޭގެ ސަބަބުން ވަރަށް ގިނަ އެކި ކަހަލަ ނުރައްކާތެރި ކަންތައް އަނިޔާވެރި ކަންކަން މަގުމަތީ ހިނގާ." ރައީސް ވިދާޅުވިއެވެ.
އެހެންނަމަވެސް، މި ވެރިކަމުގައި ކްލެމެންސީއާއި އަދި ރައީސަށް ލިބިދީފައިވާ ބާރުގެ ތެރެއިން އަދަބު ލުއިކޮށްދީގެން ވެސް މާފުދީ މިނިވަންކޮށްފައިވާނީ 86 ކުށްވެރިން ކަމަށް ރައީސް މުޢިއްޒު ވިދާޅުވިއެވެ.
