ގްލޯބަލް ޕާޓްނަޝިޕް ފޮރ އެޑިޔުކޭޝަން (ޖީޕީއީ)ގެ ބޯޑު އޮފް ޑިރެކްޓަރސްގެ ބައްދަލުވުމުގައި ތަޢުލީމާބެހޭ ވަޒީރު ޑރ. އިސްމާޢީލް ޝަފީޢު ބައިވެރިވެވަޑައިގެންފިއެވެ. މި މަހުގެ 3 އިން 5 އަށް ދުބާއީގައި ބޭއްވުނު މި ބައްދަލުވުމުގައި ވަޒީރު ބައިވެރިވެވަޑައިގެންނެވީ އޭޝިއާ އަދި ޕެސިފިކް ދާއިރާ ތަމްސީލުކުރައްވާ ބޯޑު މެންބަރުގެ ހައިސިއްޔަތުންނެވެ.
ވަޒީރުގެ އަރިހުގައި މި ބައްދަލުވުމުގައި ތަޢުލީމާބެހޭ ވުޒާރާގެ ސްޓޭޓް މިނިސްޓަރ އަދި ޓެކްނިކަލް އެޑްވައިޒަރ ޑރ. އަޙުމަދު މުޙައްމަދުވެސް ބައިވެރިވެވަޑައިގެންނެވިއެވެ. މި ބައްދަލުވުމުގައި ޖީޕީއީގެ ހިންގުމާއި ގުޅުންހުރި ގިނަ ނިންމުންތަކާއި، ކުރިއަށް ގެންދިއުމަށް ރާވާ ހަރަކާތްތަކާއި ގުޅޭގޮތުން މަޝްވަރާ ކުރެވުނެވެ. އަދި ކުރިއަށް އޮތް 3 އަހަރަށް ލަފާކުރާ ބަޖެޓު ކަނޑައެޅުމުގެ މަސައްކަތްވެސް މި ބައްދަލުވުމުގައި ކުރިއަށް ގެންދެވުނެވެ.
ޖީޕީއީއަކީ ތަރައްޤީވަމުން އަންނަ ޤައުމުތަކުގެ ތަޢުލީމީ ނިޒާމު ކުރިއެރުވުމަށް ހިލޭ އެހީ ފޯރުކޮށްދޭ ބައިނަލްއަޤްވާމީ އެންމެ ބޮޑު އެއް ފަންޑެވެ. ދިވެހިރާއްޖެ ޖީޕީއީގެ މެންބަރު ޤައުމަކަށް ވީ 2019 ވަނަ އަހަރުގެ ތެރޭގައެވެ. ޖީޕީއީން ވަނީ ރާއްޖޭގެ ތަޢުލީމީ ނިޒާމު ކުރިއެރުވުމަށް ގިނަ މަސައްކަތްތަކެއް ކޮށްދެއްވާފައެވެ.
Advertisement
ޖީޕީއީގެ 9.5 މިލިއަން އެމެރިކާ ޑޮލަރުގެ އެހީއާއެކު، ރާއްޖޭގެ ތަޢުލީމީ ނިޒާމަށް އިންގިލާބީ ހެޔޮ ބަދަލެއް ގެނައުމަށްޓަކައި "ތައިބަ" ގެ ނަމުގައި ތަޢުލީމާބެހޭ ވުޒާރާގައި ޚާއްސަ ޕްރޮޖެކްޓެއް ގާއިމުކުރެވި، އޭގެ މަސައްކަތް މިހާރު ކުރިއަށްދާކަން ފާހަގަކުރެވެއެވެ.
