ފިޝަރީޒް މިނިސްޓްރީން ރާއްޖެއިން ބޭރުން މަތީ ތައުލީމު ހޯދުމުގެ ފުރުޞަތުތަކެއް ހުޅުވާލައިފިއެވެ.
މި ފުރުޞަތުތައް ހުޅުވާލާފައިވަނީ ޓްރާންސްފޯރމިންގ ފިޝަރީޒް މެނޭޖްމަންޓުން ސައުތު ވެސްޓް އިންޑިއަން އޯޝަން ރީޖަން އެންޑް މޯލްޑިވްސް ޕްރޮޖެކްޓްގެ ދަށުންނެވެ.
މިނިސްޓްރީން ހުޅުވާލާފައިވަނީ ފިޝަރީޒް ސައިންސް ނުވަތަ މެރިން ސައިންސް އިން ބެޗްލަރސް ޑިގްރީ ހާސިލްކުރުމުގެ ދެ ފުރުޞަތާއި އެކުއަކަލްޗަރއިން ބެޗްލަރސް ޑިގްރީ ހާސިލްކުރުމުގެ އެއް ފުރުޞަތެވެ.
Advertisement
މި ސްކޮލަޝިޕްތަކަށް ކުރިމަތިލުމަށް ޝަރުތުތަކެއް ކަނޑައަޅާފައިވެއެވެ. އެގޮތުން ޖީސީއީ އޯލެވެލްގެ ފަސް މާއްދާއިން 'ސީ' އިން ފެށިގެން މަތީ ގްރޭޑެއް ޙާސިލުކޮށްފައިވުމާއި ޖީސީއީ އޭލެވެލްގެ ތިން މާއްދާއިން 'ސީ' އިން ފެށިގެން މަތީ ގްރޭޑެއް ޙާސިލުކޮށްފައިވުން ހިމެނެއެވެ. މީގެ އިތުރުން ފައުންޑޭޝަން ނުވަތަ ސެޓްފިކެޓް ލެވެލްގެ ޔުނިވަރސިޓީ އެންޓްރެންސް ޤަބޫލުކުރާ ސަނަދެއް ހާސިލްކޮށްފައިވުންވެސް ޝަރުތުތަކުގެ ތެރޭގައި ހިމެނެއެވެ.
މި ސްކޮލަރޝިޕްގެ ދަށުން ކޯސް ފީގެ އިތުރުން ބުކް އެލަވަންސް، އެސްޓަބްލިޝްމަންޓް އެލަވަންސް، ޑިޕާރޗަރ އެލަވަންސް އަދި ސްޓައިޕަންޑް ދެވޭނެއެވެ. އަދި މި ސްކޮލަރޝިޕް ލިބޭ ފަރާތްތަކުން ކޯސް ފުރިހަމަކުރުމަށްފަހު ސިވިލް ސަރވިސްގެ ޤަވާޢިދުގައި ވާގޮތަށް ފިޝަރީޒް މިނިސްޓްރީގައި ޚިދުމަތް ކުރުމަށް ބޮންޑުކުރެވޭނެއެވެ.
މި ކޯސްތަކަށް ކުރިމަތިލާން ބޭނުންވާ ފަރާތްތަކުން 2025 ވަނަ އަހަރުގެ ޖެނުއަރީ މަހުގެ 9 ވަނަ ދުވަހުގެ މެންދުރު 12:00 ގެ ކުރިން އެޕްލިކޭޝަން ހުށަހަޅަންޖެހޭނެ ކަމަަށް މިނިސްޓްރީން ބުންޏެވެ.
