ޗައިނާގެ ވެރިރަށް ބެއިޖިންގައި އިއްޔެ ބޭއްވުނު ޚާއްޞަ އިވެންޓެއްގައި ކާބަންއެކްސް ޕުރޮގުރާމު 2.0 އިފްތިތާޙްކޮށްފިއެވެ. މި އިވެންޓުގައި ދިވެހިރާއްޖޭގެ ފަރާތުން ބައިވެރިވެވަޑައިގަތީ މިނިސްޓަރ އޮފް ސްޓޭޓް ފޮރ ކްލައިމެޓް ޗޭންޖް، އެންވަޔަރަންމަންޓް އެންޑް އެނަރޖީ، ޑރ. މުޢާވިޔަތު މުޙައްމަދެވެ.
މި އިވެންޓުގައި ވާހަކަފުޅު ދައްކަވަމުން ޑރ. މުޢާވިޔަތު ވަނީ މޫސުމަށް އަންނަ ބަދަލުތަކުގެ އަސަރުތަކާއި ކުރިމަތިލުމުގައި އެކުގައި މަސައްކަތްކުރުމުގެ މުހިންމުކަން ފާހަގަ ކުރައްވާފައެވެ. އަދި މި ޕުރޮގުރާމަކީ ކާބަން މަދުކުރުމަށް އަލަށް ތަޢާރަފުކުރެވޭ ޓެކްނޮލޮޖީ ތަކަށް އެހީތެރިވުމަށް ޚާއްޞަކުރެވިފައިވާ ޕުރޮގުރާމެއްކަން މުޢާވިޔަތު ފާހަގަކުރެއްވިއެވެ.
ކާބަންއެކްސް ޕުރޮގުރާމުގެ 2.0 ވަރޝަންގައި ޚާއްޞަ އަހައްމިއްޔަތުކަމެއް ދެނީ ކާބަން ކެޕްޗަރ، ޔޫޓިލައިޒޭޝަން އަދި ސްޓޯރޭޖް (ސީސީޔޫއެސް)، ކާބަން ރިމޫވަލް، އަދި ދިގު މުއްދަތަކަށް ހަކަތަ ރައްކާކުރުމުގެ ޓެކްނޮލޮޖީ ތަކަށެވެ. މި ޕުރޮގުރާމުގެ ދަށުން ދުނިޔޭގެ އެކި ކަންކޮޅުތަކުން ހުށަހަޅާ ޕްރޮޕޯސަލްތައް ބަލައިގަނެ، އެންމެ ފުރަތަމަ ފަހަރަށް ޞިނާޢީ މާޙައުލެއްގައި ޕައިލެޓް ޕްރޮޖެކްޓްތައް ހިންގުމަށާއި، ޕޮޓެންޝަލް ހުރި ސްޓާޓްއަޕްތައް އިންކިއުބޭޓްކުރުމަށާއި، ޤާބިލުކަން އިތުރުކުރުމުގެ މަޝްރޫޢުތަކަށް އެހީތެރިކަން ފޯރުކޮށްދިނުމަށް ވަނީ ރޭވިފައެވެ.
