އިނގިރޭސި ޕްރިމިއާ ލީގުގައި ވެސްޓްހެމް އާއި ދެކޮޅަށް ކުޅެ 5 ލަނޑު 2 ލަނޑުން އާސެނަލް މޮޅުވެއްޖެއެވެ. މިއީ ޕްރިމިއަރ ލީގުގެ ތާރީޚުގައި ފުރަތަމަ ހާފުގައި 7 ގޯލު ޖެހުނު ހަތަރުވަނަ މެޗެވެ. އާސެނަލްގެ މެނޭޖަރ މިކެލް އާޓެޓާ ބުނީ ވެސްޓް ހެމާ ދެކޮޅަށް ކުޅުނު މެޗުގައި އާސެނަލުން "ކްރޭޒީ" ކޮށްލިކަމަށެވެ.

ލަންޑަން ސްޓޭޑިއަމްގައި ކުޅުނު މި މެޗުގެ ފުރަތަމަ 36 މިނެޓުގެ ތެރޭގައި އާސެނަލުން ވަނީ ގެބްރިއެލް، ލިއެންޑްރޯ ޓްރޮސާޑް، މާޓިން އޯޑެގާޑް އަދި ކައި ހަވާޓްޒް މެދުވެރިކޮށް 4 ގޯލު ޖަހާފައެވެ. އޭގެ ފަހުން ވެސްޓް ހެމުން ވަނީ 4 މިނެޓުގެ ތެރޭގައި 2 ގޯލު ޖަހާފައެވެ. ހާފު ޓައިމުގެ ކުރިން ބުކާޔޯ ސަކާ ވަނީ ޕެނަލްޓީއަކުން އާސެނަލްގެ ފަސްވަނަ ގޯލު ޖަހާފައެވެ. މިއީ އާސެނަލުން ޕްރިމިއަރ ލީގުގެ މެޗެއްގެ ފުރަތަމަ ހާފުގައި 2 ޕެނަލްޓީ ޖެހި ފުރަތަމަ ފަހަރެވެ.

އާޓެޓާ ބުނީ ގިނަ ގޯލު ޖެހުނުކަމީ އުފާވެރިކަމެއް ނަމަވެސް، ޑިފެންސްގެ ކަންތައްތައް ރަނގަޅުކުރަން ޖެހޭކަމަށެވެ. "އަޅުގަނޑުމެން ކްރޭޒީ ކޮށްލީ. މެޗު ފެށުނު އިރު ވަރަށް ރަނގަޅަށް ކުޅުނު. އަވަހަށް 3 ގޯލު ޖެހުމަށްފަހު، އެމީހުން ވަގުތުން ގޯލެއް ޖަހައި، ދެން އަނެއްކާވެސް އިތުރު ގޯލެއް ޖެހީމަ މެޗު ވަރަށް ވާދަވެރިވެގެން ދިޔަ،" އޭނާ ބީބީސީ އަށް ބުންޏެވެ.

މި ނަތީޖާއާ އެކު، އާސެނަލުން ވަނީ 2024 ވަނަ އަހަރުގެ ތެރޭގައި އެކި މުބާރާތްތަކުގެ އަވޭ މެޗުތަކުގައި 5 ނުވަތަ އެއަށްވުރެ ގިނަ ގޯލު ޖެހި 5 މެޗު ކުޅެފައެވެ. މިއީ އިނގިރޭސި ޓޮޕް ފްލައިޓް ޓީމަކުން އެއް އަހަރެއްގެ ތެރޭގައި މިފަދަ މެޗު ކުޅުނު އެންމެ ގިނަ އަދަދެވެ. މީގެ ކުރިން މި ރެކޯޑު 1892 ވަނަ އަހަރު ސަންޑަރލަންޑް އާއި 1937 ވަނަ އަހަރު މެންޗެސްޓަރ ސިޓީގައި އޮތެވެ.

މީގެ އިތުރުން، އާސެނަލުން ވަނީ ވެސްޓް ހެމާ ދެކޮޅަށް ޕްރިމިއަރ ލީގުގެ އަވޭ މެޗުތަކުގައި ޖުމްލަ 60 ގޯލު ޖަހާފައެވެ. މިއީ ޕްރިމިއަރ ލީގުގައި އެއް ޓީމަކާއި ދެކޮޅަށް އަވޭ މެޗުތަކުގައި 60 އަށްވުރެ ގިނަ ގޯލު ޖެހި ފުރަތަމަ ޓީމެވެ.

ސަކާ ވަނީ ރޭގެ މެޗުގައިވެސް އޭނާގެ ފެންވަރު ދައްކާލާފައެވެ. އޭނާ ވަނީ 1 ގޯލާއި 2 އެސިސްޓް ދީފައެވެ. މިހާރު އޭނާ ވަނީ މި ސީޒަންގައި އާސެނަލްގެ 13 މެޗުގައި 10 އެސިސްޓް ދީފައެވެ.