މަސްވެރިންގެ ދުވަހާއި ގުޅުވައިގެން ފައިސާގެ އިނާމު ލިބޭ ކެއްކުމުގެ މުބާރާތެއް ބޭއްވުމަށް މަސްވެރިކަމާއި ކަނޑުގެ ވަސީލަތްތަކާ ބެހޭ ވުޒާރާއިން ނިންމައިފިއެވެ. މި މުބާރާތަކީ ކޮންމެ އަހަރެއްގެ ޑިސެމްބަރު 10 ވަނަ ދުވަހު ފާހަގަކުރާ މަސްވެރިންގެ ދުވަހާއި ގުޅުވައިގެން ބާއްވާ ޚާއްޞަ ހަރަކާތްތަކުގެ ތެރެއިން އެއް ހަރަކާތެވެ.
މަސްވެރިކަމާއި ކަނޑުގެ ވަސީލަތްތަކާއިބެހޭ ވުޒާރާއިން ބުނީ، މި މުބާރާތުގައި ބައިވެރިވުމަށް ޝައުޤުވެރިވާ ފަރާތްތަކަށް ބައިވެރިވުމުގެ ފުރުޞަތު ހުޅުވާލާފައިވާ ކަމަށެވެ. މުބާރާތުގައި ބައިވެރިވުމަށް ޝައުޤުވެރިވާ ފަރާތްތަކަށް ޑިސެމްބަރު 3 ވަނަ ދުވަހުގެ ނިޔަލަށް ކުރިމަތިލުމުގެ ފުރުޞަތު އޮންނާނެ ކަމަށް އެ ވުޒާރާއިން ބުންޏެވެ.
އެގޮތުން، މި މުބާރާތުގައި ވާދަކުރާ ފަރާތްތަކުގެ ތެރެއިން އެންމެ މޮޅު ތިން ފަރާތަކަށް ފައިސާގެ އިނާމު ދިނުމަށް ހަމަޖެހިފައިވެއެވެ. އެގޮތުން، އެއްވަނައަށް ހޮވޭ ފަރާތަކަށް 10,000 ރުފިޔާ، ދެވަނައަށް ހޮވޭ ފަރާތަކަށް 7,000 ރުފިޔާ އަދި ތިންވަނައަށް ހޮވޭ ފަރާތަކަށް 5,000 ރުފިޔާގެ އިނާމު ދިނުމަށް ހަމަޖެހިފައިވާ ކަމަށް ވުޒާރާއިން ފާހަގަކުރިއެވެ.
