އޮސްޓްރޭލިއާގެ ސެނެޓުން ވަނީ 16 އަހަރުން ދަށުގެ ކުދިންނަށް ސޯޝަލް މީޑިއާ ބޭނުންކުރުން މަނާކުރާ ބިލެއް ފާސްކޮށްފައެވެ. މިއީ ދުނިޔޭގައި މިފަދަ އެންމެ ހަރުކަށި ގާނޫނު ކަމަށް ބެލެވެއެވެ.

ބުރާސްފަތި ދުވަހުގެ ރޭ ސެނެޓުން މި ބިލު ފާސްކޮށްފައިވާއިރު، މި ގާނޫނު ތަންފީޒުކުރަން ފަށާނީ މަދުވެގެން 12 މަސް ދުވަހުގެ ތެރޭގައެވެ. މި ގާނޫނާ ޚިލާފުވާ ޓެކްނޮލޮޖީ ކުންފުނިތަކަށް 50 މިލިއަން އޮސްޓްރޭލިއަން ޑޮލަރު (32.5 މިލިއަން އެމެރިކާ ޑޮލަރު) އާ ހަމައަށް ޖޫރިމަނާ ކުރެވިދާނެއެވެ.

އޮސްޓްރޭލިއާގެ ބޮޑުވަޒީރު އެންތަނީ އަލްބަނީޒް ވިދާޅުވި ގޮތުގައި މި ގާނޫނު މުހިންމުވަނީ ޒުވާނުން ސޯޝަލް މީޑިއާގެ ގެއްލުންތަކުން ސަލާމަތްކުރުމަށެވެ. "މިއީ ދުނިޔޭގެ މައްސަލައެއް. އަޅުގަނޑުމެން ބޭނުންވަނީ އޮސްޓްރޭލިއާގެ ޒުވާނުންނަށް ކުޑަކުދިންގެ ދައުރު ހޭދަކުރެވޭ ގޮތް ހެދުމަށް. އަޅުގަނޑުމެން ބޭނުންވަނީ މައިންބަފައިންނަށް ހިތްހަމަޖެހުން ލިބިދިނުމަށް،" ބޮޑުވަޒީރު ވިދާޅުވިއެވެ.

މި ގާނޫނުގައި ވަކި ޕްލެޓްފޯމްތަކެއް މަނާކުރާކަމެއް ބަޔާންކޮށްފައެއް ނުވެއެވެ. އެ ނިންމުންތައް ނިންމާނީ އޮސްޓްރޭލިއާގެ މުވާޞަލާތާއިބެހޭ ވަޒީރު، އީ-ސޭފްޓީ ކޮމިޝަނަރުގެ ލަފާގެ މަތިންނެވެ.

ނަމަވެސް، މި މަނާކުރުން ތަންފީޛުކުރާނެ ގޮތާއި، އަމިއްލަވަންތަކަމާއި އިޖްތިމާޢީ ގުޅުންތަކަށް މީގެ ސަބަބުން ކުރާނެ އަސަރާއި ގުޅޭ ސުވާލުތަކަށް އަދިވެސް ޖަވާބު ލިބިފައިނުވާ ކަމަށް ފާޑުކިޔާ ފަރާތްތަކުން ބުނެއެވެ.

މި ގާނޫނު ވުޖޫދަށް އައުމުގެ ކުރިން ވެސް، އޮސްޓްރޭލިއާގެ ސަރުކާރުން ވަނީ ސޯޝަލް މީޑިއާގެ ނޭދެވޭ އަސަރުތަކުން ކުޑަކުދިން ރައްކާތެރިކުރުމަށް އެކި ފިޔަވަޅުތައް އަޅާފައެވެ..