އެސްއެމްއީ ޑިވެލޮޕްމެންޓް ފައިނޭންސް ކޯޕަރޭޝަން (އެސްޑީއެފްސީ) އިން އަންހެން ވިޔަފާރިވެރިންނަށް ޚާއްސަކޮށްގެން ތަޢާރަފުކުރި "ފަށާ މަދަދު" ލޯނު ސްކީމުގެ ދަށުން މިހާތަނަށް 60 މީހަކަށް ލޯނު ދޫކޮށްފިއެވެ.

މި ލޯނު ސްކީމަކީ ސަރުކާރުގެ ހަފްތާ 14 ގެ ވައުދުތަކުގެ ތެރޭގައި ހިމެނޭ ވައުދެއް ފުއްދުމުގެ ގޮތުން މިއަހަރުގެ ފެބްރުއަރީ މަހު އިފްތިތާހުކުރި 100 މިލިއަން ރުފިޔާގެ ލޯނު ސްކީމެކެވެ. މި ސްކީމުގެ މައިގަނޑު މަޤްޞަދަކީ އަންހެން ވިޔަފާރިވެރިން ކުރިއެރުވުމެވެ.

އެސްޑީއެފްސީން ބުނީ މި މަހުގެ 18 ވަނަ ދުވަހާއި ހަމައަށް "ފަށާ މަދަދު" ލޯނު 60 މީހަކަށް ދޫކޮށްފައިވާ ކަމަށެވެ. މީގެ ތެރޭގައި ޚާއްސަ އެހީއަށް ބޭނުންވާ ހަތަރު މީހަކުވެސް ހިމެނޭއިރު، މި ލޯނު ސްކީމުގެ 25 އިންސައްތަ ޚާއްޞަކުރެވިފައިވަނީ ޚާއްޞަ އެހީއަށް ބޭނުންވާ އަންހެނުންނަށެވެ.

މުޅި ސްކީމުގެ ދަށުން ދޫކުރުމަށް ނިންމާފައިވާ 100 މިލިއަން ރުފިޔާގެ ތެރެއިން މިހާތަނަށް 45 އިންސައްތަ ވަނީ ދޫކޮށްފައިކަމަށް އެސްޑީއެފްސީން ބުންޏެވެ.

"ފަށާ މަދަދު" ލޯނު ސްކީމުގެ އަމާޒަކީ އާމްދަނީ ކަށަވަރު ނުވުމުގެ ސަބަބުން އާންމު ބޭންކުތަކުން ޚިދުމަތް ލިބިގަތުމުގައި ދަތިތަކާއި ކުރިމަތިވާ އަންހެން ވިޔަފާރިވެރިންނަށް އެހީތެރިވުމެވެ. މި ސްކީމުގެ ދަށުން އަލަށް ވިޔަފާރި ފަށާ ފަރާތްތަކަށް 500,000 ރުފިޔާއާ ހަމައަށް، 6 އިންސައްތަ އިންޓްރެސްޓް ރޭޓެއްގައި ލޯނު ދޫކުރެވެއެވެ. ލޯނު އަނބުރާ ދެއްކުމަށް 12 މަސްދުވަހުގެ ގްރޭސް ޕީރިއަޑެއް ލިބޭއިރު، 7 އަހަރު ދުވަހުގެ މުއްދަތެއް ދެވެއެވެ.

މީގެ އިތުރުން، އެސްޑީއެފްސީން ވަނީ "ފަށާ މަދަދު ލީސިން" ނަމުގައި އިތުރު ލޯނު ސްކީމެއްވެސް ތަޢާރަފުކޮށްފައެވެ. މި ސްކީމުގެ ދަށުން 10,000 ރުފިޔާއާއި 100,000 ރުފިޔާއާ ދެމެދުގެ އަދަދަކަށް ލޯނު ނެގޭނެއެވެ. މި ލޯނުގެ އިންޓްރެސްޓް ރޭޓަކީ 8 އިންސައްތައެވެ. އަދި 6 މަސްދުވަހުގެ ގްރޭސް ޕީރިއަޑަކާއެކު 5 އަހަރު ދުވަހުގެ މުއްދަތެއް ދެވެއެވެ.

މި ލޯނު ސްކީމްތަކަކީ އަންހެން ވިޔަފާރިވެރިންނަށް އިތުރު ފުރުޞަތުތަކެއް ހޯދައިދިނުމަށާއި، އަންހެނުން ވިޔަފާރީގެ ދާއިރާގައި ބާރުވެރިކުރުވުމަށް އެޅޭ މުހިންމު ފިޔަވަޅެއް ކަމަށް އެސްޑީއެފްސީން ފާހަގަކުރިއެވެ.