ދުންފަތުގެ ބާވަތްތައް ރާއްޖެ އެތެރެކުރުމަށް ހެލްތު މިނިސްޓްރީން ދޫކުރާ ލައިސަންސް ބޭނުންވާނީ އެކަމާ ގުޅޭ ޤަވާޢިދު އާންމުކުރުމަށްފަހު ކަމަށް އެ މިނިސްޓްރީން އިއްޔެ ނެރުނު އިޢުލާނެއްގައި ބުނެފިއެވެ.
ދުންފަތް ކޮންޓްރޯލްކުރުމާބެހޭ ޤާނޫނަށް 15 ނޮވެންބަރު 2024 އިން ފެށިގެން ޢަމަލުކުރަން ފެށުމާ ގުޅިގެން، ދުންފަތުގެ ބާވަތްތައް ރާއްޖެ އެތެރެކުރާ އަދި ބޭރުކުރާ ފަރާތްތަކުން، އަދި ގަނޑުކޮށް ނުވަތަ ވަކިވަކިން ވިއްކާ ފަރާތްތަކުން، ވިޔަފާރި ޙުއްދައިގެ އިތުރުން ހެލްތު މިނިސްޓްރީން ދޫކުރާ ލައިސަންސެއް އޮންނަންޖެހޭނެ ކަމަށް ޤާނޫނުގައި ބަޔާންކޮށްފައިވެއެވެ.
ނަމަވެސް، މި ލައިސަންސް ހޯދުން ލާޒިމްވާނީ ލައިސަންސް ދޫކުރުމުގެ އުޞޫލުތަކާއި އިޖުރާއަތުތައް ބަޔާންކުރާ ޤަވާޢިދު އާންމުކުރުމަށްފަހު، އެ ޤަވާޢިދުގައި ކަނޑައަޅާ މުއްދަތެއްގައި ކަމަށް ހެލްތު މިނިސްޓްރީން ބުންޏެވެ.
Advertisement
މިނިސްޓްރީގެ އިޢުލާނުގައި އިތުރަށް ބަޔާންކޮށްފައިވަނީ، ޤާނޫނާއި ޤަވާޢިދާ ޚިލާފަށް އެއްވެސް ފަރާތަކުން ދުންފަތުގެ ބާވަތްތައް ރާއްޖެ އެތެރެކޮށް، ބޭރުކޮށް، ބަހައި ނުވަތަ ވިއްކައިގެން ނުވާނެ ކަމަށެވެ.
ޤާނޫނުގައިވާ ގޮތުން، ލައިސަންސް ދޫކުރުމާ ގުޅޭ އުޞޫލުތަކާއި ޝަރުތުތައް، ލައިސަންސްގެ މުއްދަތު، އާކުރުމުގެ އިޖުރާއަތުތަކާއި ފީ ފަދަ ކަންކަން ޤަވާޢިދުގައި ބަޔާންކުރަންޖެހެއެވެ. ނަމަވެސް، މި ޤަވާޢިދު ހެދުމަށް ވަކި މުއްދަތެއް ޤާނޫނުގައި ކަނޑައަޅާފައެއް ނުވެއެވެ.
