ފާތިމަތު އަނީޤާ (ކޮކާހަނދުވަރު، ސ.ހިތަދޫ) އަކީ މިވަގުތު ވަރަށް ނާޒުކު ޙާލަތެއްގައި އޮތް 3 ކުދިންގެ މަންމައެކެވެ. އޭނާގެ ކާނާތު ފައިގެ ބޮޑުވާ އިނގިލީގެ ފޮޅެއް ނެގި ހިސާބުން ފެށިގެން، އޭނާގެ ދިރިއުޅުމަށް ވަނީ ބޮޑު ބަދަލެއް އައިސްފައެވެ. އިނގިލި ދުޅަވެ، ދޮސްގަނެ، އޭނާގެ ހިތުގައި ބިރުވެރިކަން އުފެދިފައިވާއިރު، ޞިއްޙީ ޚިދުމަތްތެރިންގެ ފަރާތުން ލިބެމުންދާ ޚަބަރުތަކަކީ އޭނާގެ ހިތަށް އިތުރު ކަންބޮޑުވުން ގެނެސްދޭ ޚަބަރުތަކެކެވެ.

އަނީޤާގެ ފަރުވާ ފެށުނީ އައްޑޫ އިކުއޭޓޯރިއަލް ހޮސްޕިޓަލުގައެވެ. ނަމަވެސް، ދެ މަސްދުވަހުގެ ފަރުވާއަށްފަހުވެސް އެދެވޭ ނަތީޖާއެއް ނުފެނުމުން، އޭނާ ޖެހުނީ މާލެއަށް އައިސް އައިޖީއެމްއެޗްގެ ފަރުވާ ހޯދާށެވެ.

އަނީޤާގެ އެންމެ ބޮޑު ދަރި އުޅެނީ ގުރޭޑް 8 ގައެވެ. އަނީޤާގެ މައިންބަފައިން ނިޔާވެފައިވާއިރު މާލޭގައި އަނީޤާގެ ގާތުގައި ހުރުމަށް އެހީތެރިއަކު ބޭނުންވާތީ ފިރިމީހާއަށް ޖެހުނީ ރިސޯޓުގައި އަދާކުރަމުންދިޔަ ވަޒީފާއިން ވަކިވާށެވެ.

އައިޖީއެމްއެޗާއި އޭޑީކޭ އަދި ޓްރީޓޮޕްގެ އެތައް ދުވަހެއްގެ ފަރުވާއަށްފަހު، އިނގިލީގެ ކަށީގައި އިންފެކްޝަން ހުރިވަރު ފުނަށް ގޮސްފައިވާތީ އިނގިލި ބުރިކޮށްލަން އައިޖީއެމްއެޗުން ލަފާ ދިނެވެ. މިއީ އަނީޤާއަށް އަދި އޭނާގެ ޢާއިލާއަށް ލިބުނު ވަރަށް ބޮޑު ހިތްދަތިކަމެކެވެ.

އިތުރު ފަރުވާ ކުރުމަށް އެހީތެރިކަން އަނީޤާ މި ދަނޑިވަޅުގައި ވަރަށް ބޭނުންވެއެވެ. އައިޖީއެމްއެޗް ހޮސްޕިޓަލުން ބުނެފައިވަނީ އިންފެކްޝަން އުފެދިފައިވާ އިނގިލި ޖެހޭނީ ބުރިކޮށްލަން ކަމަށެވެ. ނަމަވެސް އާސަންދަ ކަވަރ ނުކުރާތީ އިތުރު ފަރުވާއަށް ބޭރަށް ދިއުމަށް ބޮޑު އެހީއެއް ބޭނުންވެއެވެ. އިނގިލި ބުރިކޮށްނުލާ އިންޑިއާ އާއި ބެންކޮކުން ރަނގަޅުވާނެ ކަމުގެ އުންމީދު އެބައޮތް ކަމަށް މަޢުލޫމާތު ލިބެއެވެ.

ދިވެހިރާއްޖޭގެ ރައްޔިތުން ކިބައިން އަނީޤާ އަށް މިވަގުތު ބޭނުންވަނީ ދީލަތި އެހީއެކެވެ. ކޮންމެ ރައްޔިތެއް ވެސް އެމީހަކަށް ވެވުނު މިންވަރުން އޭނާގެ ބޭސް ފަރުވާއަށް އެހީތެރިވެދިނުމަކީ އަނީޤާއާއި އޭނާގެ ޢާއިލާގެ ވަރަށް ބޮޑު އެދުމެކެވެ.

ބީއެމް.އެލް ރުފިޔާ އެކައުންޓް: 7708386261101

ބީއެމް.އެލް ޑޮލަރ އެކައުންޓް: 7730000534603

މިކަމާއި ބެހޭ އިތުރު މަޢުލޫމާތެއް ބޭނުން ފުޅުވާނަމަ 7912041 (ފާތިމަތު އަނީޤާ) އާ ގުޅުއްވުން އެދެމެވެ.