ބްރޯޑްކޮމްގެ ރައީސާއި އިތުރު މެންބަރެއްގެ ދައުރު ހަމަވާތީ މެންބަރުކަމަށް ކުރިމަތިލުމަށް ހުޅުވާލައިފި

ބްރޯޑްކާސްޓިންގ ކޮމިޝަން އޮފް މޯލްޑިވްސް (ބްރޯޑްކޮމް)ގެ ދެ މެންބަރެއްގެ ދައުރު ހަމަވާތީ، އެ ކޮމިޝަނުގެ މެންބަރުކަމަށް ކުރިމަތިލުމުގެ ފުރުޞަތު ރައީސުލްޖުމްހޫރިއްޔާގެ އޮފީހުން ހުޅުވާލައިފިއެވެ.

ރައީސް އޮފީހުން ނެރުނު އިޢުލާނުގައި ބަޔާންކޮށްފައިވާ ގޮތުގައި، މި ފުރުޞަތު ހުޅުވާލާފައިވަނީ ބްރޯޑްކޮމްގެ މިހާރުގެ ރައީސާ މަރިޔަމް ވަހީދާ އާއި މެންބަރު އަލީ ޔޫސުފްގެ ދައުރު ހަމަވާތީއެވެ. މި ދެ މަޤާމަށް ކުރިމަތިލުމުގެ ފުރުޞަތު އޮންނާނީ އަންނަ ހަފްތާގެ އަންގާރަ ދުވަހާ ހަމައަށެވެ.

މަރިޔަމް ވަހީދާ އާއި އަލީ ޔޫސުފް ބްރޯޑްކޮމްގެ މެންބަރުކަމަށް އައްޔަންކޮށްފައިވަނީ 2019 ވަނަ އަހަރުގެ ޑިސެންބަރު 5 ވަނަ ދުވަހުއެވެ. ބްރޯޑްކޮމްގެ މެންބަރުންގެ ދައުރަކީ 5 އަހަރު ދުވަސް ކަމަށްވާތީ، މި ދެ މެންބަރުންގެ ދައުރު ހަމަވާނީ މިއަހަރުގެ ޑިސެމްބަރު 5 ވަނަ ދުވަހަށެވެ.

ބްރޯޑްކާސްޓިންގ ކޮމިޝަނަކީ ރާއްޖޭގެ ބްރޯޑްކާސްޓްކުރާ ފަރާތްތަކުގެ ބެލެނިވެރި ފަރާތެވެ. މި ކޮމިޝަނުގެ މައިގަނޑު މަސްޢޫލިއްޔަތުތަކުގެ ތެރޭގައި ރާއްޖޭގައި ބްރޯޑްކާސްޓްކުރުމުގެ ދާއިރާ ތަރައްޤީކޮށް ކުރިއެރުވުމާއި، ބްރޯޑްކާސްޓްކުރާ ފަރާތްތަކުގެ ޙައްޤުތައް ޙިމާޔަތްކުރުން ހިމެނެއެވެ.

ބްރޯޑްކޮމްގެ މެންބަރުކަމަށް ކުރިމަތިލާ ފަރާތްތަކުގައި ހުންނަންޖެހޭ ޝަރުޠުތަކާއި ހުށަހަޅަންޖެހޭ ލިޔެކިޔުންތަކުގެ ތަފްޞީލު ރައީސް އޮފީހުގެ ވެބްސައިޓުން ލިބެން ހުންނާނެ ކަމަށް އިޢުލާނުގައި ބަޔާންކޮށްފައިވެއެވެ.