އަލް މަދްރަސަތުލް ޢަރަބިއްޔަތުލް އިސްލާމިއްޔާ (ޢަރަބިއްޔާ ސްކޫލު) ގެ އައު ޢިމާރާތުގެ އަމަލީ މަސައްކަތް މިއަދު ރަސްމީކޮށް ފަށައިފިއެވެ.
މި މަޝްރޫޢުގެ ސަބަބުން ދައުލަތުގެ ބަޖެޓުން 80 މިލިއަން ރުފިޔާ ސަލާމަތްކުރެވޭނެ ކަމަށް ބެލެވެއެވެ.
އެޑިއުކޭޝަން މިނިސްޓްރީގެ ބަޔާނެއްގައި ބުނީ، މި ޢިމާރާތް އެޅުމަށް ކުރިން ހަމަޖެހިފައިވަނީ ބާ ޖަމާލުއްދީނުގެ ބިމުގައި ކަމަށެވެ. ނަމަވެސް، ބެލެނިވެރިންގެ އިލްތިމާސްއަށް އިޖާބަދެއްވައި، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވަނީ 386 ކޮށީގެ ތަނަވަސް ބިމެއް މި މަޝްރޫޢަށް ހަމަޖައްސަވައި ދެއްވާފައި ކަމަށް މިނިސްޓްރީން ބުންޏެވެ.
Advertisement
ސަރުކާރުގެ 14 ހަފްތާގެ މަގުޗާޓުގެ ދަށުން ކުރިއަށްގެންދާ މި މަޝްރޫޢުގެ އަސްލު ޑިޒައިނަށް ބަދަލުތަކެއް ގެނެވި، އަލުން އަގު ކަނޑައެޅުމަށްފަހު، ދައުލަތަށް ލިބޭ ގެއްލުން ކުޑަކުރުމުގެ ގޮތުން ކުރީގެ ކޮންޓްރެކްޓް ވަނީ ބާތިލުކޮށްފައެވެ. އޭގެ ފަހުން، ޑިޒައިން އެންޑް ބިލްޑް އުސޫލުން މި މަސައްކަތް ރަޝީދު ކާޕެންޓްރީ އެންޑް ކޮންސްޓްރަކްޝަން ޕްރައިވެޓް ލިމިޓެޑާ ވަނީ ހަވާލުކޮށްފައެވެ.
މި މަޝްރޫޢުގެ ޖުމްލަ އަގަކީ 152,945,200.65 ރުފިޔާއެވެ. އަދި މި މަސައްކަތް ނިންމުމަށް ހަވާލުކޮށްފައިވާ މުއްދަތަކީ 540 ދުވަހެވެ. މި ޢިމާރާތުގައި 40 ކްލާސްރޫމާއި، އަންޑަރގްރައުންޑް ޕާކިންގ، އަދި ޓަރފް ދަނޑެއް ހިމެނޭނެ ކަމަށް މިނިސްޓްރީން ބުންޏެވެ. މީގެ އިތުރުން، މިއީ ޒަމާނީ ވަސީލަތްތަކާއެކު، އޭސީ އަދި ސޯލާ ޕެނަލް ބޭނުންކުރެވޭނެ ގޮތަށް ފަރުމާކުރެވިފައިވާ ޢިމާރާތެއް ކަމަށް ވެސް މިނިސްޓްރީން ބުންޏެވެ.
ތަޢުލީމީ ދާއިރާގެ މާހިރުން ދެކޭގޮތުގައި މި މަޝްރޫޢަކީ ރާއްޖޭގެ ތަޢުލީމީ ދާއިރާއަށް ލިބިގެންދާނެ ފާހަގަކޮށްލެވޭ ކުރިއެރުމެކެވެ.
