ނޭޝަންސް ލީގުގެ ގްރޫޕް އޭ4 ގައި ރޭ ޑެންމާކާ ދެކޮޅަށް 2-1 އިން މޮޅުވެ ސްޕެއިނުން ގްރޫޕްގެ އެއްވަނަ ހޯދައިފައެވެ. މި މޮޅާއެކު ސްޕެއިން ވަނީ ގްރޫޕްގެ ދެވަނައިގައިވާ ޑެންމާކަށްވުރެ 6 ޕޮއިންޓް ކުރިއަރައިފައެވެ.
މި މެޗުގައި ސްޕެއިންގެ ގޯލުތައް ޖެހީ މިކެލް އޮޔާޒަބަލް އާއި އަޔޯޒެ ޕެރެޒްއެވެ. އޮޔާޒަބަލް ފުރަތަމަ ގޯލު ޖެހީ 15 ވަނަ މިނެޓުގައެވެ. ޕެރެޒް ދެވަނަ ގޯލު ޖެހީ 58 ވަނަ މިނެޓުގައެވެ.
ޑެންމާކުގެ ހަމައެކަނި ގޯލު ޖެހީ ގުސްޓަވް އިސަކްސެންއެވެ. އޭނާ ގޯލު ޖެހީ މެޗު ނިމުމުގެ 6 މިނެޓު ކުރިންނެވެ.
Advertisement
މި މޮޅާއެކު ސްޕެއިން ވަނީ މާރޗް މަހު ބޭއްވޭ ކުއާޓަރ ފައިނަލަށް ދަތުރު ކަށަވަރުކޮށްފައެވެ. ސްޕެއިންގެ ކޯޗު ލުއިސް ޑެ ލަ ފުއެންޓެގެ ދަށުން ސްޕެއިން ވަނީ ވިދިވިދިގެން 15 މެޗުގައި ބަލިނުވެ ކުޅެފައެވެ. މިއީ 2018 ގެ ފަހުން ސްޕެއިން ބަލިނުވެ އެންމެ ގިނަ ދުވަސްވަންދެން ކުޅެމުން އަންނަ ފަހަރުކަން ފާހަގަ ކުރެވެއެވެ. ސްޕެއިން އެންމެ ފަހުން ބަލިވީ އެކުވެރިކަމުގެ މެޗެއްގައި 0-1 އިން ކޮލަމްބިއާ އަތުންނެވެ.
