މިދިޔަ ސަރުކާރުން ތަޢުލީމީ ދާއިރާގެ މުވައްޒަފުންނަށް ކޮށްފައިވާ އަނިޔާވެރި ޢަމަލުތައް ރަނގަޅުކުރުމަށް މަސައްކަތްތަކެއް ކުރަމުންދާ ކަމަށް އެޑިއުކޭޝަން މިނިސްޓަރ ޑރ. އިސްމާޢީލް ޝަފީޢު ވިދާޅުވެއްޖެއެވެ.
މިނިސްޓަރ މިފަދައިން ވިދާޅުވެފައިވަނީ ރޭ ދައުލަތުގެ މީޑިއާގެ ޕްރޮގްރާމެއްގައި ވާހަކަދައްކަވަމުންނެވެ.
މިނިސްޓަރ ޝަފީޢު ވިދާޅުވިގޮތުގައި، ކުރީގެ ސަރުކާރުން 40 އަށްވުރެ ގިނަ ޕްރިންސިޕަލުން އެބޭފުޅުންގެ އަނބިދަރިންނާ ދުރަށް، އެހެން ރަށްރަށަށް ބަދަލުކޮށްފައިވާ ކަމަށެވެ. އަދި 300 އަށްވުރެ ގިނަ މުދައްރިސުންނަށް އެއްވެސް ހެއްކެއް ނެތި އިންޒާރު ދީފައިވާކަމަށް މިނިސްޓަރ ހާމަކުރެއްވިއެވެ.
Advertisement
"މިއީ ވަރަށް ހިތާމަވެރި ކަމެއް. އަޅުގަނޑުމެންގެ ޓީޗަރުންނާއި ޕްރިންސިޕަލުންނަށް މިފަދަ އަނިޔާވެރި ޢަމަލުތައް ކުރުމަކީ ގަބޫލުކުރެވޭނެ ކަމެއް ނޫން." މިނިސްޓަރ ވިދާޅުވިއެވެ.
އެހެންނަމަވެސް، މިހާރުގެ ސަރުކާރުން މި މައްސަލަތައް ޙައްލުކުރުމަށް މަސައްކަތްތަކެއް ކުރަމުންދާ ކަމަށް މިނިސްޓަރ ފާހަގަކުރެއްވިއެވެ. އެގޮތުން ރައީސް ޑރ. މުޙައްމަދު މުޢިއްޒުގެ އިރުޝާދުގެ ދަށުން، ކުރިން ބަދަލުކުރެވުނު 40 ޕްރިންސިޕަލުން އަނބުރާ އެބޭފުޅުންގެ އަމިއްލަ ރަށްރަށަށް ބަދަލުކޮށްފައިވާ ކަމަށް މިނިސްޓަރ ހާމަކުރެއްވިއެވެ.
"އަޅުގަނޑުމެންގެ އަމާޒަކީ ތަޢުލީމީ ދާއިރާގައި މަސައްކަތްކުރާ ހުރިހާ ފަރާތްތަކަށްވެސް އިންސާފުވެރި އަދި ރައްކާތެރި މާޙައުލެއް ޤާއިމުކޮށްދިނުން. މިކަމަށްޓަކައި ސަރުކާރުން ގިނަގުނަ މަސައްކަތްތަކެއް ކުރަމުން ގެންދާނެ." މިނިސްޓަރ ވިދާޅުވިއެވެ.
