ކާރިޘާތަކުން ރައްކާތެރިވުމަށްޓަކައި ދުރާލާ އިންޒާރުދޭ ނިޒާމުތައް ޤާއިމުކޮށް، ރާއްޖޭގެ ހުރިހާ ކަންކޮޅެއްގައި އުޅޭ ހުރިހާ ރައްޔިތުންގެ ރައްކާތެރިކަން ކަށަވަރުކުރުމަށް ސަރުކާރުން ވަރަށް ބޮޑު އިސްކަމެއް ދެއްވާކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ.

ރައީސް މިހެން ވިދާޅުވީ އަޒަރުބައިޖާނުގައި މިހާރު ކުރިއަށްދާ ކޮޕް ސަމިޓުގެ ތެރެއިން ބޭއްވި ޕެނަލް ޑިސްކަޝަނެއްގައި ވާހަކަފުޅު ދައްކަވަމުންނެވެ. މި ބައްދަލުވުމަކީ ކާރިޘާތަކުން ރައްކާތެރިވުމަށްޓަކައި ދުރާލާ އިންޒާރުދޭ ނިޒާމުތަކާއި ދުނިޔެ ހޫނުވުމާއި ގުޅޭގޮތުން ބޭއްވުނު ބައްދަލުވުމެކެވެ.

ރައީސް ވިދާޅުވީ ރާއްޖެއަށް އެތައް ގޮތަކުން ބޮޑެތި ގެއްލުންތަކެއް ލިބުނު ސުނާމީ ކާރިޘާއިން ގިނަ ފިލާވަޅުތަކެއް ލިބިގެންދިޔަކަމަށެވެ. އެގޮތުން ދުރާލާ ލިބޭ އިންޒާރުތަކާއި ތައްޔާރީ ޙާލަތުގައި ތިބުމަކީ ގިނަ ބައެއްގެ ފުރާނަ ސަލާމަތްކޮށް، ގެއްލުން ކުޑަކުރެވޭނެ ކަމެއްކަމަށް ރައީސް ފާހަގަކުރެއްވިއެވެ.

މޫސުމީ ނުރައްކާތަކުން ސަލާމަތްވުމަށް އެމަނިކުފާނު ވެރިކަމާއި ޙަވާލުވުމަށްފަހު ރެޒިލިއަންސް އެޖެންޑާއެއް ތަޢާރަފްކޮށްފައިވާ ކަމަށާއި، ރާއްޖެއަކީ މިފަދަ ސްޓްރެޓީޖިކް ރޯޑްމެޕެއް އެކަށައެޅި ފުރަތަަމަ ޤައުމުކަމަށް ރައީސް ވިދާޅުވިއެވެ. އަދި ސަރުކާރުން އެކަށައަޅާ 20 އަހަރުގެ ތަރައްޤީގެ ޕްލޭންގައި ކްލައިމެޓް ރެޒިލިއަންސް، ޑިސާސްޓަރ ޕްރިޕޭއާޑްނަސް އަދި އަރލީ ވަރނިންގ ސިސްޓަމްތަކަށް އިސްކަންދީފައިވާނެކަމަށާއި މިއީ މުސްތަޤްބަލް ރައްކާތެރިކުރުމަށް އަޅާ މުހިއްމު ފިޔަވަޅެއް ކަމަށްވެސް ރައީސް ފާހަގަކުރެއްވިއެވެ.

ރައީސް ވިދާޅުވީ ކާރިޘާތަކުން ރައްކާތެރިވުމަށްޓަކައި ދުރާލާ އިންޒާރުދޭ ނިޒާމްތަކަކީ ދިރިއުޅުމަށް ކުރާ މަސައްކަތަށް ކުރެވޭ ބޮޑު އިންވެސްޓްމަންޓެއްކަމަށާއި، މިއީ އިޤްތިޞާދީގޮތުން ކޮންމެހެންވެސް ކުރަންޖެހޭ ކަމެއްކަމަށެވެ. އަދި މި މަސައްކަތުގައި ރާއްޖެއިން ކުރިއެރުންތަކެއް ހޯދާފައިވާއިރު، އެ މަސައްކަތް ކާމިޔާބުކުރުމަށް އިތުރު ވަޞީލަތްތަކާއި އެހީތެރިކަން ބޭނުން ވާކަންވެސް ރައީސް ފާހަގަކުރެއްވިއެވެ. އެހެންކަމުން މިކަމުގައި ބައިނަލްއަޤްވާމީ އެހީތެރިކަމާއި އެއްބާރުލުން ބޭނުންވާކަމަށާއި ހާއްސަކޮށް މެރިން ފޯކާސްޓިންގ އެންޑް އޮބްޒަވޭޝަން އަދި އާލީ ވާނިން ކެޕެބަލިޓީ ތަރައްޤީކުރުމުގައި އެހީތެރިކަން ބޭނުންވާކަން ރައީސް ވިދާޅުވިއެވެ.