ޏ. ފުވައްމުލަކު ބޭރުގައި ދޮށީ ކަނދުފައްޗެއް އަޅައިފިއެވެ.
ފިޝަރީޒް މިނިސްޓްރީން ބުނީ ފުވައްމުލަކުގައި އެޅި ދޮށީގެ ކަނދުފަތި އަޅާފައި ވަނީ ފުވައްމުލަކުގެ އިރު ދެކުނުން 11 މޭލު ބޭރުގައި ކަމަށެވެ. މިގޮތުން މި ކަނދުފަތީގެ ނަންބަރަކީ R10D01ކަމަށް މިނިސްޓްރީން ބުންޏެވެ.
ރާއްޖޭގެ އެކި ހިސާބުތަކުގައި ސަރުކާރުން ކަނދުފަތިތައް ޤާއިމުކުރަމުން އަންނަ އިރު، މިދިޔަ ހަފްތާގައި ވަނީ ލ. ހިތަދޫ އިރުދެކުނުން 12 މޭލު ބޭރުގައި އަދި ފ. ހިމަތީގެ ހުޅަނގުން 28 މޭލު ބޭރުގައި ކަނދުފަތި ޤާއިމުކޮށްފައެވެ.
Advertisement
ފިޝަރީޒް މިނިސްޓަރ އަޙްމަދު ޝިޔާމް މީގެ ކުރިން ވިދާޅުވެފައިވަނީ ރާއްޖޭގައި 2 ބާވަތެއްގެ ކަނދުފަތި އަޅާފައިވާ ކަމަށެވެ. އެއީ ކަޅުބިލަމަހުގެ މަސްވެރިކަމަށް ޚާއްޞަކޮށް އަޅާފައިވާ ދޮށީ ކަނދުފައްޗާއި، ސްޕޯރޓްސް ފިޝިންއަށް އަޅާފައިވާ ވަދު ކަނދުފައްޗެވެ.
ފަތުރުވެރިކަމުގެ ސިނާއަތް ކުރިއަރަމުންދާއިރު މިހާރު ވަރަށް ބޮޑަށް ވަދު ކަނދުފަތި އެޅުމަށް އެދެމުން އަންނަ ކަމަށާއި، މިހާރުވެސް 89 ވަދު ކަނދުފަތި އެޅުމަށް އެކި ފަރާތްތަކުން އެދިފައިވާކަމަށް ޝިޔާމް ފާހަގަކުރެއްވިއެވެ.
މި ސަރުކާރު ވެރިކަމާ ހަވާލުވުމަށްފަހު މިހާތަނަށް ޖުމްލަ 32 ކަނދުފަތި ވަނީ އަޅާފައެވެ.
