މިއަހަރުގެ އޮކްޓޫބަރު މަހުގެ ނިޔަލަށް ދައުލަތަށް ޢާމްދަނީގެ ގޮތުގައި 29.1 ބިލިޔަން ރުފިޔާ ލިބިފައިވާކަމަށް މިނިސްޓްރީ އޮފް ފިނޭންސްއިން ހާމަކޮށްފިއެވެ.

މާލީ ވުޒާރާއިން ނެރެފައިވާ އެންމެފަހުގެ ވީކްލީ ފިސްކަލް ރިޕޯޓުގައިވާ ގޮތުން، މިއަހަރުގެ ފުރަތަމަ ދިހަމަސްދުވަހު ލިބުނު 29.1 ބިލިޔަން ރުފިޔާއަކީ މިދިޔަ އަހަރުގެ މި މުއްދަތުގައި ލިބުނު 28.6 ބިލިޔަން ރުފިޔާއާ އަޅާބަލާއިރު 1.5 އިންސައްތައިގެ އިތުރު ޢަދަދެކެވެ.

މި ޢާމްދަނީގެ ތެރޭގައި ހިމެނެނީ ޓެކްސްގެ ގޮތުގައި ލިބުނު 22.3 ބިލިޔަން ރުފިޔާއާއި، ޓެކްސް ނޫން ޢާމްދަނީގެ ގޮތުގައި ލިބުނު 6.2 ބިލިޔަން ރުފިޔާއާއި، އެހީގެ ގޮތުގައި ލިބުނު 565 މިލިޔަން ރުފިޔާއެވެ.

ޓެކްސް ޢާމްދަނީގެ ތެރޭގައި މައިގަނޑު ގޮތެއްގައި ހިމެނެނީ އިމްޕޯޓު ޑިއުޓީ، ބިޒްނަސް އެންޑް ޕްރޮޕަޓީ ޓެކްސް (ބީޕީޓީ) އަދި ގުޑްސް އެންޑް ސަރވިސް ޓެކްސް (ޖީއެސްޓީ) ގެ ގޮތުގައި ލިބުނު ފައިސާއެވެ. މީގެ ތެރެއިން އިމްޕޯޓު ޑިއުޓީގެ ގޮތުގައި 2.6 ބިލިޔަން ރުފިޔާ، ބީޕީޓީގެ ގޮތުގައި 5.7 ބިލިޔަން ރުފިޔާ އަދި ޖީއެސްޓީގެ ގޮތުގައި 11.9 ބިލިޔަން ރުފިޔާ ލިބިފައިވެއެވެ.

މީގެ އިތުރުން، ގްރީން ޓެކްސްގެ ގޮތުގައި 880.1 މިލިޔަން ރުފިޔާ އަދި އެއަރޕޯޓު ސަރވިސް ޗާޖާއި ޑިޕާޗަރ ޓެކްސްގެ ގޮތުގައި 930 މިލިޔަން ރުފިޔާ ލިބިފައިވާކަމަށް މާލީ ވުޒާރާއިން ހާމަކޮށްފައިވެއެވެ.

އަދި މިއަހަރުގެ ފުރަތަމަ ދިހަމަސްދުވަހު ދައުލަތުގެ ޚަރަދުތައް ޖުމްލަ 41.1 ބިލިޔަން ރުފިޔާއަށް އަރާފައިވާކަމަށް މާލީ ވުޒާރާގެ ހިސާބުތަކުން ދައްކައެވެ. މީގެ ތެރޭގައި ރިކަރަންޓް ޚަރަދުގެ ގޮތުގައި 27.9 ބިލިޔަން ރުފިޔާ އަދި ކެޕިޓަލް ޚަރަދުގެ ގޮތުގައި 11.1 ބިލިޔަން ރުފިޔާ ހިމެނެއެވެ.