ވެރިކަމަކީ ވެރިކަން ކުރާ މީހާއަށް ލިބޭ މުދާގަނޑެއް ނޫންކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ.

އެމަނިކުފާނު މިހެން ވިދާޅުވީ މިރޭ ބޭއްވި ޖުމްހޫރީ ދުވަހުގެ ރަސްމީ ޖަލްސާގައި ވާހަކަފުޅުދައްކަވަމުންނެވެ.

މިރޭގެ ޖަލްސާގައި ވާހަކަފުޅުދައްކަވަމުން ރައީސް ވިދާޅުވީ ވެރިކަމަކީ އެއްވެސް ޙާލެއްގައި ލިބޭ މާ ބޮޑު މޮޅެއް ނޫން ކަމަށާއި، އެއީ ވެރިކަން ކުރާ މީހާއަށް ލިބޭ މުދާގަނޑެއް ވެސް ނޫން ކަމަށެވެ.

ރައީސް ވިދާޅުވީ ވެރިކަމަކީ ވަރުގަދަ ޒިންމާއެއް ކަމަށާއި، ވަރުގަދަ މަސްޢޫލިއްޔަތެއް ކަމަށެވެ. އަދި އެއީ ވަރަށް ބޮޑު އަމާނާތެއް ކަމަށް ރައީސް ވިދާޅުވިއެވެ.

ރައީސް ވިދާޅުވީ އެމަނިކުފާނުގެ ބައްޕާފުޅު ފަޟީލަތުލް އުސްތާޛުއްޝައިޙް އަލްމަރްޙޫމް ހުސެއިން ޢަބްދުއްރަހްމާން ލިޔުއްވާފައިވާ "ދައުލަތާއި ވެރީންނާއި މަސްޢޫލިއްޔަތު އަދި ކިޔަމަންވުމުގެ މަފްހޫމް" ފޮތަކީ ވެރިކަން ކުރުމަށް އެމަނިކުފާނުގެ "ގައިޑު" ކަމަށެވެ.

^{ރައީސުލްޖުމްހޫރިއްޔާ އެމަނިކުފާނުގެ ބައްޕާފުޅު ފަޟީލަތުލް އުސްތާޛުއްޝައިޙް އަލްމަރްޙޫމް ހުސެއިން ޢަބްދުއްރަހްމާން ލިޔުއްވާފައިވާ "ދައުލަތާއި ވެރީންނާއި މަސްޢޫލިއްޔަތު އަދި ކިޔަމަންވުމުގެ މަފްހޫމް" ފޮތާއެކު. / ފޮޓޯ: ރައީސް އޮފީސް}

"އަޅުގަނޑު މިއަދާ ހަމައަށްވެސް ބަލަމުން އައީ މިފޮތް. އެއީ މީގައި ކީރިތި ޤުރްއާނުގެ އަލީގައި، ކީރިތި ރަސޫލާ  صَلَّى اللهُ عَلَيْهِ وَسَلَّمَ ގެ މާތްވެގެންވާ ސުންނަތުގެ އަލީގައި، ދެން މި ދެންނެވި ފަދައިން އިސްލާމީ ތާރީޚުގެ އަލީގައި އަދި ރާއްޖޭގެ ޤާނޫނު އަސާސީއާއި ޤާނޫނުތަކަށް ރިޢާއަތްކޮށް ރާއްޖޭގެ ކޮންޓެކްސްޓުގައި ވަރަށް ވަށާޖެހޭ ގޮތެއްގައި ބައްލަވާލައްވާފައިވާތީ އަޅުގަނޑަށް މި ފޮތުން ވަރަށް ގިނަ ކަންތައްތައް އެނގި ހާމަވެގެންދޭ." ރައީސް ވިދާޅުވިއެވެ.

ޖުމްހޫރީ ދުވަހާ ގުޅޭ ގޮތުން ވާހަކަފުޅުދައްކަވަމުން ރައީސް ވިދާޅުވީ ޖުމްހޫރީ ދުވަހަކީ ރައްޔިތުންގެ ދުވަހެއް ކަމަށެވެ. މި ދުވަހަކީ ރައްޔިތުން އިންތިޚާބު ކުރާ ވެރިއަކު ހޮވައި، ވެރިކަން ކުރުމުގެ ބާރު އެމީހަކާ ޙަވާލުކޮށްގެން އެ ކުރާ މަސައްކަތާއި ޒިންމާތަކާ ގުޅޭ ދުވަހެއް ކަމަށް ރައީސް ވިދާޅުވިއެވެ.