އެމެރިކާގެ އިންތިޚާބީ ރައީސް ޑޮނަލްޑް ޓްރަމްޕް، ޔޫކްރެއިނާއި ރަޝިޔާ ދެމެދު ބަފަރ ޒޯނެއް ހެދުމަށްޓަކައި ބްރިޓިޝް ސިފައިން ބޭނުންކުރުމަށް ރާވަމުންދާ ކަމަށް ވޯލް ސްޓްރީޓް ޖާނަލްއިން ރިޕޯޓުކޮށްފިއެވެ. މި ރޭވުމުގެ ދަށުން، 800 މޭލުގެ ސަރަޙައްދެއްގައި ޔޫރަޕިއަން ސިފައިން ދަތުރުކުރަމުންދާނެ ކަމަށް ބުނެވެއެވެ. މިއީ ޔޫކްރެއިންއަށް ދެމުންދާ އެހީ މަދުކޮށް، ރަޝިޔާއަށް ފައިދާވާ ގޮތަށް ޙައްލެއް ހޯދުމަށް ޓްރަމްޕް މަސައްކަތްކުރަމުންދާކަމުގެ އިޝާރާތެއް ކަމަށް ބެލެވެއެވެ.

ބަފަރ ޒޯނަކީ ހަމަނުޖެހުން ހުއްޓުވުމަށް އިދިކޮޅު ބާރުތައް ނުވަތަ ޤައުމުތައް ވަކިކުރުމަށް އުފައްދާ ނިއުޓްރަލް ސަރަޙައްދެކެވެ. އަސްކަރީ ކުރިމަތިލުންތަކުގެ ފުރުޞަތު ކުޑަކުރުމުގެ ބޭނުމުގައާއި ޞުލްޙައިގެ މަޝްވަރާތައް ކުރިއެރުވުމަށް މިކަމުން އެހީތެރިވެދޭނެއެވެ. ޓްރަމްޕްގެ މި ނިންމުމަކީ ޔޫރަޕުން އަމިއްލައަށް އެމީހުންގެ ސަރަޙައްދުގައި ހަމަޖެހުން ޤާއިމްކުރުމަށް މަސައްކަތްކުރުމަށް ވިދާޅުވުމެވެ.

ރިޕޯޓުތައް ބުނާ ގޮތުގައި ޓްރަމްޕްގެ ޓީމުގެ މެންބަރަކު ވިދާޅުވެފައި ވަނީ އެމެރިކާއިން ސިފައިން ނުފޮނުވާނެ ކަމަށާއި، މިކަމުގެ ޚަރަދު ވެސް ނުކުރާނެ ކަމަށެވެ. އޭގެ ބަދަލުގައި ޕޮލެންޑް، ޖަރުމަނު، ބްރިޓެއިން އަދި ފްރާންސްގެ ސިފައިން މިކަމަށް ބޭނުންކުރަން ބޭނުންވާ ކަމަށް ޓްރަމްޕް ވިދާޅުވެފައި ވެއެވެ.

^{ޒެލެންސްކީ އުއްމީދުކޮށްގެން ހުންނެވީ ޓްރަމްޕްގެ ސަރުކާރުގައި އިތުރު ހަތިޔާރާއި ފައިސާ ލިބި ރަޝިއާ ހަނގުރާމަ ކުރިޔަށް ގެންދިޔުމަށް އެމެރިކާގެ ފުރިހަމަ ތާޢީދު ދެމިއޮންނާނެ ކަމަށް. އެހެންނަމަވެސް ރިޕޯޓުތައް ބުނަނީ ޓްރަމްޕުގެ ވިސްނުން ހުރީ ރަޝިއާއާއި ދެކޮޅަށް ނޫން ކަމަށް. މިކަމާއިމެދު ޒެލެންސްކީ ހުންނެވީ ވަރަށް ބޮޑަށް ކަންބޮޑުވެފަ.}

ނަމަވެސް، ޔޫކްރެއިންގެ ރައީސް ވޮލޮޑިމިރް ޒެލެންސްކީ މިކަމާއި ކަންބޮޑުވުން ފާޅުކޮށް، ރަޝިޔާއަށް ލުއިދިނުމަކީ ޔޫރަޕުން "އަމިއްލައަށް މަރުވުން" ކަމުގައި ވިދާޅުވެފައިވެއެވެ. އަދި ބަލިކަށިކަން ދައްކައިގެން ހަމަހަމަ ޞުލްޙައެއް ނުގަނެވޭނެ ކަމަށް ވެސް އޭނާ ވިދާޅުވިއެވެ.

މި މައްސަލައާ ގުޅިގެން ބްރިޓެއިންގެ ބައެއް ސިޔާސީ ފަރާތްތަކުން ވެސް ކަންބޮޑުވުން ފާޅުކޮށްފައިވާއިރު، އެމެރިކާގެ އެހީތެރިކަން ނެތި ޔޫރަޕަށް އެކަނި ޔޫކްރެއިންއަށް އެހީތެރިވުމަކީ ދަތިކަމެއް ކަމަށް ބުނެފައިވެއެވެ.

ފާހަގަކޮށްލަން ޖެހޭ ކަމަކީ، އެމެރިކާގެ ރިޔާސީ އިންތިޚާބުގެ ކެމްޕޭނުގައި ޓްރަމްޕް ވަނީ އިންތިޚާބު ކާމިޔާބުކުރައްވައިފިނަމަ، ރައީސްކަމުގެ މަޤާމާއި ހަވާލުވެވަޑައިގަންނަވާތާ 24 ގަޑިއިރުގެ ތެރޭގައި ރަޝިޔާ-ޔޫކްރެއިން ހަނގުރާމަ ހުއްޓުވާނެ ކަމަށް ވިދާޅުވެފައެވެ. އަނެއްކޮޅުން ޓްރަމްޕަށް އިންތިޚާބު ކާމިޔާބު ކުރެވުމާއެކު ޕޫޓިން ވަނީ މަރުޙަބާ ވިދާޅުވެ މަޝްވަރާ ކުރުމަށް ތައްޔާރަށް ހުންނެވި ކަމަށް ވެސް ވިދާޅުވެފައެވެ.