މ. މުލީގައި "މަގޭ ސާފު ރާއްޖެ" މަޝްރޫޢުގެ ދަށުން މަސައްކަތު ބައްދަލުވުމެއް ބާއްވައިފިއެވެ.
ތިމާވެއްޓާ ބެހޭ ވުޒާރާއިން ބުނީ "މޯލްޑިވްސް ކްލީން އެންވަޔަރަންމަންޓް ޕްރޮޖެކްޓް" ގެ ދަށުން "މަގޭ ސާފު ރާއްޖެ" މަޝްރޫޢުގެ ކޮމިއުނިޓީ ޗެމްޕިއަންސް ބާރުވެރިކުރުވުމަށް މުލީގައި ބޭއްވި މަސައްކަތު ބައްދަލުވުން ބާއްވާފައިވަނީ ތިން ދުވަހުގެ މުއްދަތަށް ކަމަށެވެ.
މި ބައްދަލުވުމުގައި މ. މުލި އަދި މުލަކުގެ ކޮމިއުނިޓީ ލީޑަރުން ބައިވެރިވެ، ކުނި އެއްކުރުމާއި، ޑޭޓާ ޕްރޮސެސްކުރުމާއި، އަދި އޮޕަރޭޝަނަލް އުސޫލުތަކާ ބެހޭ ޢަމަލީ ތަމްރީނު ހޯދާފައިވާ ކަމަށް ވުޒާރާއިން ބުންޏެވެ.
Advertisement
ވުޒާރާއިން ބުނީ ވޯލްޑް ބޭންކުގެ އެހީގައި ކުރިއަށްދާ މި މަޝްރޫޢުގެ ދަށުން، މުލި އަދި މުލަކަކީ އިތުރު 17 ރަށާއެކު އައު ކުނި މެނޭޖްކުރާ މަރުކަޒުތަކާއި އާލާތްތައް ލިބުނު ރަށްތައް ކަމަށާއި، މިކަމުގެ ސަބަބުން ޒޯން 4 އަދި 5 ގައި ދެމެހެއްޓެނިވި ގޮތެއްގައި ކުނި އަދި ވަސީލަތްތައް މެނޭޖްކުރުމުގެ މަސައްކަތް އިތުރަށް ހަރުދަނާވެގެންދާނެ ކަމަށެވެ.
މި މަސައްކަތު ބައްދަލުވުމަކީ ރާއްޖޭގެ ތިމާވެށި ސާފުކޮށް ބެލެހެއްޓުމަށް ކުރެވޭ މުހިންމު މަސައްކަތެއް ކަމަށް ވުޒާރާއިން ފާހަގަކުރިއެވެ. މީގެ ސަބަބުން ރަށު ފެންވަރުގައި ކުނި މެނޭޖްކުރުމުގެ ޤާބިލުކަން އިތުރުވެ، ދެމެހެއްޓެނިވި ގޮތެއްގައި ވަސީލަތްތައް ބޭނުންކުރުމަށް މަގުފަހިވެގެންދާނެކަމަށް ވުޒާރާއިން ބުންޏެވެ.
