ގްރޭޑް 8 ގެ ދަރިވަރުންގެ އިމްތިހާނު ދެ ފިޔަވައްސަކަށް ބަހާލަނީ

ގްރޭޑް 8 ގެ ދަރިވަރުންގެ އިމްތިހާނު ދެ ފިޔަވައްސަކަށް ބަހާލައިގެން ކުރިއަށް ގެންދިއުމަށް އެޑިއުކޭޝަން މިނިސްޓްރީން ނިންމައިފިއެވެ.

އެޑިއުކޭޝަން މިނިސްޓްރީން ސްކޫލްތަކަށް ފޮނުވި އިންޓާނަލް މެމޯއެއްގައި ބުނީ ސްކޫލްތަކުގެ ޕްރިންސިޕަލުންނާއެކު ބޭއްވި ޕޮލިސީ މަޝްވަރާ ބައްދަލުވުންތަކަށް ފަހު ގިނަ ޢަދަދެއްގެ ޕްރިންސިޕަލުންގެ ލަފައާއެކު 2024 ގެ ދިރާސީ އަހަރުގެ ގްރޭޑް 8 ގެ ދަރިވަރުން ފަހު ޓާމްގެ މެދު ބަންދަށްފަހު ސްޓްރީމް ކުރުމަށް ނިންމާފައިވާ ކަމަށެވެ.

2024 ގެ ދިރާސީ އަހަރުގެ ޓާމްގެ އިމްތިހާނުތައް ބޭއްވުމަށް ހަމަޖެހިފައިވަނީ އަންނަ އަހަރުގެ ފެބްރުވަރީ މަހުގެ 8-22 އަށެވެ. ނަމަވެސް ގްރޭޑް 8 ގެ ދަރިވަރުން އިމްތިހާނު ކުރާނީ ދެ ފިޔަވައްސަކަށް ބަހާލައިގެން ކަމަށް މިނިސްޓްރީން ބުންޏެވެ. އެގޮތުން އެ ދަރިވަރުން ކިޔަވާ ކޮންބައިންޑް ސައިންސް، ކޮންބައިންޑް ބިޒްނަސް، އަދި ހިސާބު މާއްދާތަކުގެ އިމްތިހާނު ކުރިއަށްގެންދާނީ 19-14 ޑިސެންބަރު 2024 އަށް ކަމަށާއި، ސޯޝަލް ސްޓަޑީޒް، ހެލްތު އެންޑް ޕީއީ އަދި ކްރިއޭޓިވް އާޓްސްގެ ފޯމެޓިވް އެސެސްމެންޓްތައް ވެސް މި މުއްދަތުގައި ނިންމަންވާނެކަމަށް މިނިސްޓްރީން ވަނީ އަންގާފައެވެ.

މީގެ އިތުރުން ގްރޭޑް 8 ގައި ކިޔަވާ ދަރިވަރުންގެ ފަހު ޓާމް އިމްތިހާނުގެ ދެވަނަ ފިޔަވަހި ކުރިއަށްގެންދާނީ 15-20 ފެބްރުވަރީގައި ކަމަށާއި މި ފިޔަވަހީގައި ދަރިވަރުން އިމްތިހާނުކުރާނީ އިސްލާމް، ދިވެހި އަދި އިނގިރޭސި މާއްދާއިން ކަމަށް މިނިސްޓްރީން ވަނީ އަންގާފައެވެ.

ގްރޭޑް 8 ގެ ދަރިވަރުންގެ ސްޓްރީމް މާއްދާތައް ކިޔަވަމުންދާއިރު، އެސެސްމަންޓް ފޯ ލާނިން ގެންދަންވާނެ ކަމަށްވެސް ސްކޫލްތަކަށް ވަނީ އަންގާފައެވެ.

މިނިސްޓްރީން ބުނީ 2024 ގެ ދިރާސީ އަހަރުގެ ދެވަނަ ޓާމްގެ ރިޕޯޓު ފޮތް ހުރިހާ ދަރިވަރުންނަށް ވެސް ދޫކުރާނީ 27 ފެބްރުވަރީ 2025 ގައި ކަމަށެވެ.