ދެމެހެއްޓެނިވި ގޮތެއްގައި އާސަންދަ ސްކީމްގެ ޚިދުމަތްތައް ދިނުމަށްޓަކައި، އެންސްޕާއިން ދީފައިވާ އިރުޝާދާ އެއްގޮތްވާ ގޮތުގެ މަތިން، އާސަންދަ ސްކީމަށް ގެނެވުނު ބަދަލުތައް ގެނެވިފައިވަނީ އިންޝުއަރެންސް ޚިދުމަތް ފޯރުކޮށްދޭ ކުންފުނިތަކާ މަޝްވަރާ ކުރުމަށްފަހުގައި ކަމަށް ނޭޝަނަލް ސޯޝަލް ޕްރޮޓެކްޝަން އޭޖެންސީ (އެންސްޕާ) އިން މިއަދު ހާމަކޮށްފިއެވެ.

އެންސްޕާއިން މަޢުލޫމާތު ދިންގޮތުގައި، މި ބަދަލުތަކާ ގުޅޭގޮތުން އިންޝުއަރެންސް ޚިދުމަތްދޭ ހުރިހާ ފަރާތްތަކާ ބައްދަލުކޮށް މަޝްވަރާކުރެވިފައިވެއެވެ. އަދި މި ބަދަލުތަކަށް ތައްޔާރުވުމަށް ހުރިހާ ކުންފުނިތަކުންވެސް އެއްބަސްވެފައިވާ ކަމަށް އެންސްޕާއިން ބުނެފައިވެއެވެ. ބައެއް ކުންފުނިތަކުން މި ބަދަލުތަކަށް ކުރިއްސުރެ ތައްޔާރުވަމުން ދިޔަކަންވެސް ފާހަގަކޮށްފައިވެއެވެ.

އާސަންދަ ސްކީމަށް ބަދަލު ގެނައީ ޚިދުމަތްދޭ ފަރާތްތަކާ މަޝްވަރާކޮށްގެން ނަމަވެސް، މި ބަދަލުތައް ތަންފީޛުކުރަން ފެށުމާއެކު، ބައެއް އިންޝުއަރެންސް ކުންފުނިތަކުން ކޭޝްލެސް ޚިދުމަތް ހުއްޓާލާފައިވާކަން ފާހަގަކުރެވޭ ކަމަށާއި. މިކަމުގެ ސަބަބުން އާންމުންގެ މެދުގައި ކަންބޮޑުވުން އުފެދިފައިވީނަމަވެސް، އަމިއްލަ ޖީބުން ފައިސާ ދައްކަންޖެހުނު ނަމަވެސް، ކުރިއެކޭ އެއްގޮތަށް އާސަންދަ ޚިދުމަތް ލިބޭނެކަން އެންސްޕާއިން ޔަގީންކޮށްދީފައިވެއެވެ.

މި އައު ސިޔާސަތުގެ މައިގަނޑު މަޤްޞަދަކީ އާސަންދަ ނިޒާމު އެއްހަމަކުރުން ކަމަށާއި، މި ބަދަލުތަކުގެ ސަބަބުން މުޅި ނިޒާމަށް ހެޔޮ ބަދަލުތަކެއް އަންނާނެކަމަށް އެ އިދާރާއިން އުންމީދުކުރެއެވެ.

އިތުރު މަޢުލޫމާތެއްގެ ގޮތުން، ޕްރައިވެޓް އިންޝުއަރެންސްގެ ތެރޭގައި މޯލްޑިވްސް ޕޮލިސް ސަރވިސް އަދި މޯލްޑިވްސް ޑިފެންސް ފޯސްއިން ހިންގާ ސްކީމްތައް ނުހިމެނޭނެކަން އެންސްޕާއިން ހާމަކޮށްފައިވެއެވެ. އަދި އެނދުމަތިކޮށްގެން ދެވޭ ފަރުވާ (އިންޕޭޝަންޓް) ބިލްތަކަށް މިހާރުވެސް ޢަމަލުކުރަމުންދާ އުޞޫލުން އާސަންދަ ސްކީމުން ޚިދުމަތް ދިނުމަށް ޚިދުމަތްދޭ ފަރާތްތަކަށް އަންގާފައިވާކަންވެސް އެންސްޕާއިން ފާހަގަކޮށްފައިވެއެވެ.