އިސްރާއީލުން ދިން ޙަމަލާގައި ހިޒްބުﷲގެ އޭރުގެ ވެރިޔާ އަވަހާރަވުމާއި ގުޅިގެން ޝޫރާ ކައުންސިލުން މިއަދު އެ ޖަމާޢަތުގެ އައު ލީޑަރަކަށް ނަޢީމް ޤާސިމް އައްޔަން ކޮށްފިއެވެ.
60 އަހަރުގެ ދީނީ އިލްމުވެރިއެއް ކަމަށްވާ ޤާސިމް މި މަޤާމަށް އައްޔަންކުރީ، ސެޕްޓެމްބަރު މަހު ބެއިރޫތުގައި އިޒްރޭލުން ދިން ވައިގެ ހަމަލާއެއްގައި އެ ޖަމާޢަތުގެ ކުރީގެ ވެރިޔާ ހަސަން ނަސްރުﷲ އަވަހާރަވުމާ ގުޅިގެންނެވެ. ނަސްރުﷲ އަވަހާރަވުމަށްފަހު ވަގުތީ ވެރިޔާގެ ޒިންމާތައް މިހާތަނަށް އަދާކުރަމުން ގެންދިޔައީ ވެސް ޝެއިޚް ނައީމް ޤާސިމްއެވެ.
ޝައިޚް ނައީމް ޤާސިމްއަކީ 1953 ވަނަ އަހަރު ބެއިރޫތުގައި އުފަންވި، 30 އަހަރަށްވުރެ ގިނަ ދުވަހު ހިޒްބުﷲގެ އިސް މަޤާމެއްގައި ހުންނެވި ބޭފުޅެކެވެ. އޭނާ 1991 ގައި އެ ޖަމާޢަތުގެ ވެރިޔާގެ ނައިބުގެ މަޤާމަށް އައްޔަންކުރެވުނެވެ. އަދި އޭގެ އަހަރެއް ފަހުން ހަސަން ނަސްރުﷲ އަށް ހިޒްބުﷲ ގެ އެންމެ އިސް މަޤާމު ލިބިވަޑައިގަތުމުންވެސް ނައިބުގެ މަޤާމުގައި ޤާސިމް ދެމިހުންނެވިއެވެ.
Advertisement
އިސްރާއީލާއި ފަލަސްތީނުގެ އިސްލާމިސްޓް ޖަމާއަތް ހަމާސްއާ ދެމެދު ހިނގަމުންދާ ހަމަނުޖެހުންތަކުގެ ތެރޭގައި ޣައްޒާގައި ފަލަސްތީނަށް ތާއީދުކުރާ އެއްވުމެއްގައި ލުބުނާނުގެ ހިޒްބުاللهގެ އޭރުގެ ނައިބު ލީޑަރު ޝެއިޚް ގާސިމް ވާހަކަ ދައްކަވަނީ. އޭނާ މިއަދު ވަނީ އެ ޖަމާޢަތުގެ އެންމެ އިސް މީހާ ކަމަށް ހަމަޖައްސާފައި / ފޮޓޯ: ރޮއިޓާސް
ޝައިޚް ޤާސިމްގެ ސިޔާސީ މައިދާނުގައި މަސައްކަތް ފެއްޓެވީ 1974 ގައި އުފެދުނު ލުބުނާނުގެ އަމަލް މޫވްމަންޓުންނެވެ. 1979 ގައި އޭނާ އަމަލް ދޫކޮށްލެއްވީ އީރާނުގެ އިސްލާމީ އިންޤިލާބަށް ފަހުގައެވެ. އަދި 1982 ގައި ހިޒްބުﷲ އުފެދުމަށް ބޭއްވި ބައްދަލުވުންތަކުގައި އޭނާ ބައިވެރިވެވަޑައިގަތެވެ.
ޝައިޚް ޤާސިމްއަކީ ހިޒްބުﷲ ގެ އިސް ބަސްބުނާ ފަރާތްތަކުގެ ތެރޭގައި ހިމެނޭ ބޭފުޅެކެވެ. އޭނާވަނީ ބޭރުގެ މީޑިއާތަކަށް އެ ޖަމާޢަތުގެ ނަމުގައި ގިނަ އިންޓަވިއުތައް ދެއްވާފައެވެ.
