މޫސުމަށް އަންނަ ބަދަލުތަކާއި ކުރިމަތިލުމަށް ޒަމާނީ ޓެކްނޮލޮޖީގެ އެހީ ހޯދުމަކީ މުހިންމު ކަމެއްކަމަށް މޫސުމީ ބަދަލުތަކާއި ތިމާވެއްޓާއި ހަކަތައާ ބެހޭ ވަޒީރު ޠާރިޤް އިބްރާހީމް ވިދާޅުވެއްޖެއެވެ. ވަޒީރު މިހެން ވިދާޅުވީ ކޮލަމްބިއާގައި ކުރިއަށްދާ ކޮޕް 16 ގައި ބައިވެރިވެވަޑައިގަތުމަށް ވަޑައިގެން އުޅުއްވަނިކޮށް، ޕްލެނެޓްގެ ޗީފް އިމްޕެކްޓް އޮފިސަރ އެންޑްރޫ ޒޮލީއާއި ބައްދަލުކުރައްވައި ދެއްކެވި ވާހަކަފުޅުގައެވެ.
މި ބައްދަލުވުމުގައި ދިވެހިރާއްޖެއަށް ދިމާވެފައިވާ ތިމާވެށީގެ ގޮންޖެހުންތަކާއި ބެހޭގޮތުން މަޝްވަރާކުރެވުނެވެ. އަދި މި ގޮންޖެހުންތަކަށް ހައްލު ހޯދުމަށް ޕްލެނެޓްގެ ސެޓެލައިޓް ޑޭޓާ ބޭނުންކުރެވިދާނެ ގޮތްތަކާއި ގުޅޭގޮތުންވެސް މަޝްވަރާކުރެވުނެވެ. ޚާއްޞަކޮށް ގޮނޑުދޮށް ގިރުމުގެ މައްސަލަ ބެލުމާއި، ދިރޭތަކެތީގެ މާހައުލު ރައްކާތެރިކުރުމާއި، މޫސުމަށް އަންނަ ބަދަލުތަކާއި ކުރިމަތިލުމުގެ ޤާބިލުކަން އިތުރުކުރުމަށް ސެޓެލައިޓް ޑޭޓާ ބޭނުންކުރެވިދާނެ ގޮތްތައް ދެނެގަތުމަށް ކުރެވިދާނެ މަސައްކަތްތަކާއި ބެހޭ ގޮތުން ދެ ބޭފުޅުން ވާހަކަފުޅު ދެއްކެވިއެވެ.
ވަޒީރު ޠާރިޤް އިބްރާހީމް ވިދާޅުވީ، ދިވެހިރާއްޖެއަކީ ކުދި ޖަޒީރާ ޤައުމަކަށްވާތީ މޫސުމަށް އަންނަ ބަދަލުތަކުގެ އަސަރު ރާއްޖެއަށް ވަރަށް ބޮޑަށް ކުރާކަމަށެވެ. އެހެންކަމުން، މި ކަންކަމާ ކުރިމަތިލުމަށް ޒަމާނީ ޓެކްނޮލޮޖީގެ އެހީ ހޯދުމަކީ ވަރަށް މުހިންމު ކަމެއްކަމަށް ވަޒީރު ފާހަގަކުރެއްވިއެވެ.
Advertisement
ޕްލެނެޓްގެ ޗީފް އިމްޕެކްޓް އޮފިސަރ އެންޑްރޫ ޒޮލީ ވިދާޅުވީ، ސެޓެލައިޓް ޑޭޓާ ބޭނުންކޮށްގެން ދިވެހިރާއްޖޭގެ ތިމާވެށި ރައްކާތެރިކުރުމަށާއި، މޫސުމަށް އަންނަ ބަދަލުތަކާއި ކުރިމަތިލުމަށް އެހީތެރިވެދެވޭނެ ކަމަށެވެ.
ވަޒީރުގެ މި ދަތުރުފުޅުގައި، ކޮޕް 16ގެ ޔޫއެން ބަޔޯޑައިވަރސިޓީ ކޮންފަރެންސްގެ އޯޝަން ޑޭގެ މަތީ ފެންވަރުގެ ޖަލްސާގައި ބައިވެރިވެވަޑައިގެންނެވިއެވެ. މި ޖަލްސާގައި ވާހަކަފުޅުދައްކަވަމުން ވަޒީރު ޠާރިޤް އިބްރާހީމް ވިދާޅުވީ، 2030 ވަނަ އަހަރާއި ހަމައަށް ދުނިޔޭގެ ކަނޑުގެ 30% ރައްކާތެރިކުރުމުގެ ލަނޑުދަނޑި ޙާޞިލްކުރުމަށް ރާއްޖެއިން ގަދައަޅައި މަސައްކަތްކުރަމުންދާ ކަމަށެވެ.
މީގެ އިތުރުން، ކަނޑުގެ ދިރުންތަކާއި ޤުދުރަތީ މާޙައުލު ރައްކާތެރިކޮށް ދެމެހެއްޓުމަށް އިސްކަންދިނުމަކީ ވަރަށް މުހިންމު ކަމެއްކަމަށް ވަޒީރު ފާހަގަކުރެއްވިއެވެ. އަދި މިކަމަށް ދުނިޔޭގެ ހުރިހާ ޤައުމުތަކުން އެއްބާރުލުން ދިނުމަކީ ވަރަށް މުހިންމު ކަމެއްކަމަށް މޫސުމީ ބަދަލުތަކާއި ތިމާވެއްޓާއި ހަކަތައާ ބެހޭ ވަޒީރު ޠާރިޤް އިބްރާހީމް އިތުރަށް ވިދާޅުވިއެވެ.
