ޤަވާޢިދާ ޚިލާފަށް މާލޭގައި ޢާމްދަނީ ހޯދަމުންދިޔަ ފަސް ބިދޭސީން އިމިގްރޭޝަނުން އަތުލައިގެންފިއެވެ.

މިމީހުން އަތުލައިގަތީ މާލޭގައި ހުރި ތިން ކެފޭއަކަށް އިމިގްރޭޝަނުން ކުރި ރެއިޑެއްގައެވެ.

އިމިގްރޭޝަނުން ބުނީ އެފަރާތަށް ލިބުނު ރިޕޯޓަކާއި ގުޅިގެން އިއްޔެ ހިންގި ރެއިޑު އޮޕަރޭޝަންގައި ތިން ކެފޭއެއް ބަލައި ފާސްކުރި ކަމަށާއި، އަދި އެ ތަންތަނުން ޤަވާއިދާ ޚިލާފަށް މަސައްކަތް ކުރަމުންދިޔަ ފަސް ބިދޭސީން އިމިގްރޭޝަނުގެ ބެލުމުގެ ދަށަށް ގެންގޮސްފައިވާ ކަމަށެވެ.

ސަރުކާރުން މިހާރު ދަނީ ޤަވާއިދާ ހިލާފަށް އުޅޭ ބިދޭސީން ހޯދުމުގެ މަސައްކަތް ކުރަމުންނެވެ. މި މަސައްކަތުގެ ދަށުން މި މަހުގެ 21 އާ ހަމައަށް 4،361 ބިދޭސީން ވަނީ ރާއްޖެއިން ފުރުވާލާފަ އެވެ.

އިމިގްރޭޝަނުން ބުނީ މިހާރު ހައްޔަރުކޮށްފައިވާ ފަސް ބިދޭސީން އެ މީހުންގެ ގައުމަށް ފުރުވާލުމުގެ މަސައްކަތް ކަމާ ގުޅުންހުރި އިދާރާތަކާ ގުޅިގެން ކުރިއަށް ގެންދާނެ ކަމަށެވެ. 

ފާހަގަކޮށްލެވޭ ގޮތުގައި، އިމިގްރޭޝަން ވޮޗާއި ފުލުހުން ގުޅިގެންވެސް ބިދޭސީންގެ މައްސަލަތައް ހައްލު ކުރުމަށް ދަނީ ބޮޑެތި މަސައްކަތްތަކެއް ކުރަމުންނެވެ. އެގޮތުން ކ. ގުރައިދޫގައި ވެސް ޚާއްސަ އޮޕަރޭޝަނެއް ވަނީ ޖައްސާފައެވެ. އެ އޮޕަރޭޝަނުގެ ތެރެއިން 39 ބިދޭސީއަކު މޯލްޑިވްސް އިމިގްރޭޝަންގެ ބެލުމުގެ ދަށަށް ގެންދިޔައެވ.

މި ޚާއްސަ ރެއިޑް އޮޕަރޭޝަން ކުރިއަށް ގެންދިޔައީ ޤަވާއިދާ ޚިލާފަށް އުޅޭ ބިދޭސީންގެ މައްސަލަތައް ހައްލުކުރުމަށް ކުރިއަށް ގެންދާ މަސައްކަތުގެ ތެރެއިން، ޤަވާއިދާ ޚިލާފަށް ރާއްޖޭގެ އެކި އަތޮޅުތަކުގައި އުޅޭ ބިދޭސީން ބަލާ ފާސްކުރުމަށް 24 އޮކްޓޯބަރުގައި ފެށި ޚާއްސަ އޮޕަރޭޝަންގެ ތެރެއިންނެވެ.